ក្រសួងការបរទេស និងសហប្រតិបត្តិការអន្តរជាតិកម្ពុជា និងអនុប្រធានបេសកកម្មនៃស្ថានទូតជប៉ុនប្រចាំកម្ពុជា បានវាយតម្លៃខ្ពស់ចំពោះទំនាក់ទំនងរវាងកម្ពុជា-ជប៉ុន ខណៈភាគីទាំងពីរថា ទំនាក់ទំនងការទូតនឹងរួមចំណែកពង្រឹងភាពជាដៃគូយុទ្ធសាស្រ្តគ្រប់ជ្រុងជ្រោយរវាងកម្ពុជា-ជប៉ុន បន្ថែមទៀតផងដែរ។
ភាគីទាំងពីរថ្លែងដូច្នេះ នៅក្នុងជំនួបរវាងលោក សោម វិសាល អនុរដ្ឋលេខាធិការក្រសួងការបរទេស ជាមួយលោក NAGASE Kensuke អគ្គរាជទូត និងជាអនុប្រធានបេសកកម្មនៃស្ថានទូតជប៉ុន កាលពីចុងសប្តាហ៍នេះ។
នាឱកាសនោះ លោក សោម វិសាល បានសម្តែងនូវការអបអរសាទរជូនលោក NAGASE Kensuke ចំពោះការទទួលបានការតែងតាំងជាអគ្គរាជទូត និងជាអនុប្រធានបេសកកម្មនៃស្ថានទូតជប៉ុនប្រចាំកម្ពុជា។ លោកអនុរដ្ឋលេខាធិការ ក៏បានសម្តែងនូវភាពជឿជាក់ដែរថា ក្នុងអាណត្តិបេសកកម្មការទូតនៅកម្ពុជា លោក NAGASE Kensuke នឹងរួមចំណែកយ៉ាងសកម្មក្នុងការនាំមកនូវសមិទ្ធផលបន្ថែមទៀតដល់ទំនាក់ទំនងកម្ពុជា-ជប៉ុនផងដែរ។
ជាមួយគ្នានេះ លោក NAGASE Kensuke អគ្គរាជទូត និងជាអនុប្រធានបេសកកម្មនៃស្ថានទូតជប៉ុន ក៏បានថ្លែងអំណរគុណឯកឧត្តមអនុរដ្ឋលេខាធិការ ចំពោះពាក្យពេចន៍ជូនពរដ៏កក់ក្តៅ និងការចំណាយពេលវេលាទទួលជួបរូបលោក ខណៈលោក ក៏បានបញ្ជាក់ពីការត្រៀមសហការជិតស្និទ្ធដើម្បីរួមចំណែកពង្រឹងភាពជាដៃគូយុទ្ធសាស្រ្តគ្រប់ជ្រុងជ្រោយកម្ពុជា-ជប៉ុន បន្ថែមទៀត។
សូមរម្លឹកដែរថា កម្ពុជា-ជប៉ុន បានបើកកិច្ចពិភាក្សារួមគ្នា ដើម្បីបន្តពង្រឹង និងពង្រីកកិច្ចសហប្រតិបត្តិការលើវិស័យការពារជាតិនៃប្រទេសទាំងពីរឱ្យកាន់តែរឹងមាំថែមទៀត។នេះបើយោងតាមជំនួបពិភាក្សាការងាររវាងសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក KIHARA Minoru រដ្ឋមន្ត្រីការពារជាតិជប៉ុន កាល ទី៥ ខែសីហា ឆ្នាំ២០២៤។
ទន្ទឹមគ្នានេះ ថ្លែងក្នុងឱកាសនៃជំនួបនេះដែរ លោករដ្ឋមន្រ្តីក្រសួងការពារជាតិជប៉ុន ក៏បានគោរពជម្រាបជូនសម្តេចធិបតី អំពីលទ្ធផលនៃនៃកិច្ចសហប្រតិបត្តិការប្រកបដោយផ្លែផ្កា រវាងក្រសួងការពារជាតិ នៃប្រទេសជប៉ុន និងកម្ពុជា។ទន្ទឹមគ្នានេះ លោករដ្ឋមន្រ្តីបានគូសបញ្ជាក់ថា ក្នុងក្របខ័ណ្ឌនៃ «ភាពជាដៃគូយុទ្ធសាស្ត្រគ្រប់ជ្រុងជ្រោយ» ជប៉ុននឹងបន្តពង្រឹង និងពង្រីកកិច្ចសហប្រតិបត្តិការជាមួយនឹងកម្ពុជាបន្ថែមទៀត រួមទាំងក្នុងវិស័យការពារជាតិ និងសន្តិសុខថែមទៀត។
តាមរយៈជំនួបនោះដែរ សម្ដេចធិបតី ហ៊ុន ម៉ាណែត ក៏បានថ្លែងអរគុណរដ្ឋាភិបាល និងប្រជាជនជប៉ុន ដែលបានចូលរួមគាំទ្រដល់ដំណើរការស្វែងរកសន្តិភាព និងអភិវឌ្ឍសង្គម-សេដ្ឋកិច្ចនៅកម្ពុជា រហូតមកដល់ពេលបច្ចុប្បន្ន ហើយសម្តេចធិបតីបានវាយតម្លៃខ្ពស់ ចំពោះកិច្ចសហប្រតិបត្តិការលើវិស័យការពារជាតិនៃប្រទេសទាំងពីរនាពេលកន្លងមកផងដែរ៕ អត្ថបទ៖ រង្សី
