ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានត្រាស់បង្គាប់តែងតាំង ឧកញ៉ា វ៉ាន់ ស៊ូអៀង ជាទីប្រឹក្សាក្រសួងពាណិជ្ជកម្ម ដោយពុំទទួលប្រាក់បំណាច់មុខងារ តាមរយៈព្រះរាជក្រឹត្យលេខ នស/រកត/០៦២៤/៧២៥ ចុះថ្ងៃទី២៧ ខែមិថុនា ឆ្នាំ២០២៤ តាមសេចក្តីក្រាបបង្គំទូលថ្វាយរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។
លោកឧកញ៉ា វ៉ាន់ ស៊ូអៀង វ័យ៧១ឆ្នាំ ត្រូវបានគេដឹងថាជា អនុប្រធានក្រុមប្រឹក្សាភិបាល អេស៊ីអា អ៊ិនសូរិន (ខេមបូឌា), អនុប្រធានក្រុមប្រឹក្សាភិបាល Asia Properties Cambodia Ltd, ប្រធានក្រុមប្រឹក្សាភិបាល PPS Garment Factory, ប្រធាន PPS Industrial Estate Holding Co., Ltd. ប្រធាន Cambodian Country Club (CCC) នៅផ្លូវ២០០៤, ប្រធាន ហ្គោលដេន សូរិយា ម៉ល និងជាប្រធាន Boutique Hotel La Plantation Resort and SPA ។
លោកឧកញ៉ា ក៏មានតួនាទីនៅក្នុងស្ថាប័នជាច្រើនដូចជា៖ ប្រធានកិត្តិយសសហព័ន្ធនិយោជក និងសមាគមពាណិជ្ជកម្មកម្ពុជា (CAMFEBA) ប្រធានកិត្តិយសក្រុមប្រឹក្សាភិបាលសមាគមរោងចក្រកាត់ដេរនៅកម្ពុជា (GMAC) និងជាអភិបាលមួយរូប នៃធនាគារ អេស៊ីលីដា ផងដែរ។
សូមជម្រាបថា លោក វ៉ាន់ ស៊ូអៀង ដែលជាអ្នកសិក្សាជ្រៅជ្រះមួយរូប បញ្ចប់ការសិក្សាមកពីទីក្រុងប៉ារីស ប្រទេសបារាំង ព្រមទាំងមានមុខជំនួញជាច្រើនក្នុងដៃ ត្រូវបានព្រះមហាក្សត្រចេញព្រះរាជក្រឹត្យត្រាស់បង្គាប់ផ្តល់គោរមងារ «ឧកញ៉ា» កាលថ្ងៃទី១១ ខែកុម្ភៈ ឆ្នាំ២០១៣៕
