ក្រសួងហិរញ្ញវត្ថុឡាវ កាលពីពេលថ្មីៗនេះ បានឈានដល់ការចុះហត្ថលេខាលើកិច្ចព្រមព្រៀង ជាមួយក្រុមហ៊ុន PTL Holding ដើម្បីបង្កើតធនាគារមាសមួយឈ្មោះថា Lao Bullion Bank ដើម្បីផ្តល់មូលនិធិបម្រុងសម្រាប់ប្រព័ន្ធសេដ្ឋកិច្ច និងហិរញ្ញវត្ថុរបស់ប្រទេស។
យោងតាមការចុះផ្សាយពីសារព័ត៌មានក្នុងស្រុក Vientiane Times បានបង្ហាញឲ្យដឹងទៀតថា ការបង្កើតធនាគារមាសនេះ គឺឆ្លុះបញ្ចាំងពីការប្តេជ្ញាចិត្តរួមគ្នាចំពោះចក្ខុវិស័យរបស់រដ្ឋាភិបាល ក្នុងការកសាងទុនបំរុងមាស និងការលើកកម្ពស់ស្ថិរភាពហិរញ្ញវត្ថុរបស់ប្រទេសឡាវ បន្ថែមទៀត។
ធនាគារមាសដំបូងបំផុតមួយនេះ ត្រូវបានគេរពឹងទុកខ្ពស់ថា នឹងផ្តល់សក្តានុពលលើប្រព័ន្ធហិរញ្ញវត្ថុ គាំទ្រគោលនយោបាយរូបិយវត្ថុ និងសារពើពន្ធ ក៏ដូចជាពង្រឹងប្រាក់គីបឡាវ សម្រួលដល់ការរៃអង្គាសប្រាក់ និងកែលម្អលំហូរសាច់ប្រាក់ សម្រាប់ការអភិវឌ្ឍជាតិប្រកបដោយប្រសិទ្ធភាព។
គួរឲ្យដឹងផងដែរថា ធនាគារមាសនេះ គ្រោងនឹងចាប់ផ្តើមបើកដំណើរការសម្រាប់ដំណាក់កាលដំបូងក្នុងខែកញ្ញា ហើយនឹងចាប់ផ្តើមដំណើរការពេញលេញរបស់ខ្លួន នៅខែវិច្ឆិកា។
ជម្រាបជូនថាឡាវ ជាប្រទេសឈានមុខគេមួយក្នុងពិភពលោក ទាក់ទងនឹងការជីកយករ៉ែ និងផលិតមាស ដោយប្រទេសនេះជាប់ចំណាត់ថ្នាក់លេខ៣ ក្នុងតំបន់អាស៊ាន និងលេខ៦ នៅអាស៊ី។ តាមការស្ទង់មតិបឋម បានប៉ាន់ប្រមាណថាឡាវ មានប្រហែល ៥០០ ទៅ ១ ០០០ តោននៃទុនបំរុងមាសរបស់ខ្លួន៕
