តុលាការធម្មនុញ្ញរបស់ប្រទេសថៃ បានធ្វើការសម្រេចនៅថ្ងៃពុធ ទី១៤ ខែសីហានេះថា នាយករដ្ឋមន្ត្រីថៃ លោក Srettha Thavisin នឹងត្រូវបណ្តេញចេញពីតំណែង បន្ទាប់ពីបានដឹកនាំប្រទេសតិចជាងមួយឆ្នាំ។ នេះបើតាមការចុះផ្សាយពីសារព័ត៌មាន CNA។
ជុំវិញការដកតំណែងនេះ ត្រូវបានកើតឡើង បន្ទាប់ពីសមាជិកព្រឹទ្ធសភាចំនួន ៤០រូប ដែលត្រូវបានតែងតាំងដោយអតីតរដ្ឋាភិបាលក្រោមរបបយោធា បានដាក់ពាក្យប្ដឹងលោក Srettha ជុំវិញការតែងតាំងអតីតមេធាវីម្នាក់ដែលធ្លាប់ជាប់ពន្ធនាគារ។
គួរដឹងថាលោក Srettha ក្លាយជានាយករដ្ឋមន្ត្រីថៃទី៤ ក្នុងរយៈពេល ១៦ឆ្នាំចុងក្រោយ ដែលត្រូវបានតុលាការ ដកចេញពីតំណែង បន្ទាប់ពីសម្រេចថា លោកបានបំពានច្បាប់រដ្ឋធម្មនុញ្ញ ដោយសារតែតែងតាំងរដ្ឋមន្ត្រីដែលមិនគោរពតាមក្រមសីលធម៌។
ជម្រាបថា ការដកតំណែងលោក Srettha បន្ទាប់ពីកាន់អំណាចតិចជាងមួយឆ្នាំនេះ មានន័យថា សភាត្រូវតែកោះប្រជុំ ដើម្បីជ្រើសរើសនាយករដ្ឋមន្ត្រីថ្មី ជាមួយនឹងការរំពឹងទុកនៃភាពមិនច្បាស់លាស់បន្ថែមទៀត នៅក្នុងប្រទេស ក្រោយកើតមានរដ្ឋប្រហារ និងសេចក្តីសម្រេចរបស់តុលាការដែលបានទម្លាក់រដ្ឋាភិបាល និងគណបក្សនយោបាយជាច្រើន៕
