លោកស្រី Paetongtarn Shinawatra បានក្លាយជានាយករដ្ឋមន្ត្រីវ័យក្មេងបំផុតមិនធ្លាប់មានរបស់ប្រទេសថៃ បន្ទាប់ពីត្រូវបានសភាបានទទួលយកការតែងតាំងរបស់លោកស្រីជាបេក្ខភាពនាយករដ្ឋមន្ត្រីថ្មីជំនួសលោក Srettha Thavisin ដោយគណបក្សភឿថៃដែលកំពុងកាន់អំណាច។ នេះបើតាមការចុះផ្សាយពីសារព័ត៌មាន CNBC។
លោកស្រី Paetongtarn នឹងត្រូវឡើងកាន់អំណាចជំនួសលោក Srettha ដែលត្រូវបានដកចេញពីតំណែងដោយសេចក្តីសម្រេចរបស់តុលាការធម្មនុញ្ញរបស់ប្រទេសថៃ កាលពីថ្ងៃពុធ ជុំវិញការបំពានច្បាប់ធម្មនុញ្ញដោយសារតែការតែងតាំងរដ្ឋមន្ត្រីធ្លាប់ជាប់គុក។
លោកស្រី Paetongtarn បច្ចុប្បន្នវ័យ ៣៧ឆ្នាំ គឺជាកូនស្រីពៅរបស់មហាសេដ្ឋី លោក ថាក់ស៊ីន ស៊ីណាវ៉ាត្រា និងក្លាយជាសមាជិកទីបីនៃគ្រួសារស៊ីណាវ៉ាត្រា បន្ទាប់ពីឪពុក និងម្តាយមីងដែលធ្លាប់កាន់តំណែងកំពូលរបស់ប្រទេសមួយនេះ។
គួរឲ្យដឹងថា ក្រុមចម្រុះដែលកំពុងកាន់អំណាចបានជ្រើសរើសយកលោកស្រី Paetongtarn ជាអ្នកជំនួសតំណែងរបស់លោក Srettha នៅក្នុងកិច្ចប្រជុំមួយរបស់បក្សកាលពីយប់ថ្ងៃព្រហស្បតិ៍ បន្ទាប់ពីគ្មានគណបក្សណាមួយក្នុងចំណោមគណបក្សចំនួន១០ ផ្សេងទៀតនៅក្នុងក្រុមចម្រុះ បានដាក់ចេញនូវបេក្ខភាពនាយករដ្ឋមន្ត្រីរបស់ខ្លួននោះឡើយ។
ជម្រាបជូនថា គណបក្សភឿថៃ និងដៃគូរបស់ខ្លួនទទួលបានអាសនៈសរុបចំនួន ៣១៤ ក្នុងសភា ដែលនេះមានន័យថាលោកស្រី Paetongtarn ត្រូវការការយល់ព្រមពីសមាជិកសភាតែជាងពាក់កណ្តាលនៃសមាជិកសភាបច្ចុប្បន្នសរុបចំនួន ៤៩៣ នាក់ប៉ុណ្ណោះ ដើម្បីក្លាយជានាយករដ្ឋមន្ត្រីថ្មីរបស់ប្រទេសថៃ៕
