យោងតាមទិន្នន័យផ្លូវការមួយ បានបង្ហាញនៅថ្ងៃអង្គារ ទី២០ ខែសីហានេះថា ការនាំចូលប្រេងឆៅរបស់ចិន ពីអ្នកផ្គត់ផ្គង់កំពូលរុស្ស៊ី បានធ្លាក់ចុះ ៧,៤% គិតក្នុងខែកក្កដា បើធៀបទៅនឹងរយ:ពេលដូចគ្នាកាលពីឆ្នាំមុន។ នេះបើតាមការចុះផ្សាយពីសារព័ត៌មាន CNA។
ការមកដល់នៃប្រេងរបស់រុស្ស៊ី ចូលមកកាន់ប្រទេសចិន រួមទាំងតាមរយៈបំពង់បង្ហូរប្រេង និងការដឹកជញ្ជូនតាមមធ្យោបាយផ្សេងទៀត សរុបមានចំនួន ៧,៤៦ លានតោន កាលពីខែមុន ឬស្មើទៅនឹង ១,៧៦ លានបារ៉ែលក្នុងមួយថ្ងៃ (bpd)។ នេះបើយោងតាមទិន្នន័យទទួលបានពីរដ្ឋបាលទូទៅនៃគយចិន។
ទន្ទឹមនឹងនេះ សម្រាប់ការនាំចូលពីប្រទេសអារ៉ាប៊ីសាអូឌីត ដែលត្រូវបានចាត់ទុកថាជាអ្នកផ្គត់ផ្គត់ធំបំផុតទី២ របស់ចិន មានចំនួនសរុប ៦,៤១ លានតោន ឬស្មើនឹង ១,៥១ លានបារ៉ែលក្នុងមួយថៃ ពោលគឺបានកើនឡើង ១៣% ធៀបនឹងឆ្នាំមុន។
ដោយឡែកចំពោះការនាំចូលពីប្រទេសម៉ាឡេស៊ី ដែលជាមជ្ឈមណ្ឌលដឹកជញ្ជូនដ៏សំខាន់មួយផ្សេងទៀត បានកើនឡើង ៦១% ក្នុងឆ្នាំនេះ ដល់ចំនួន ៦,២១ លានតោន ឬ ១,៤៦ លានបារ៉ែលក្នុងមួយថ្ងៃ ដោយរក្សាប្រទេសក្នុងតំបន់អាស៊ាននេះ ជាអ្នកផ្គត់ផ្គង់ធំជាងគេទីបីរបស់ចិន សម្រាប់ខែកក្កដា។
ជម្រាបជូនផងដែរថា ការនាំចូលប្រេងសរុបក្នុងខែកក្កដា មកកាន់ប្រទេសចិន បានធ្លាក់ចុះដល់កម្រិតទាបបំផុតមិនធ្លាប់មាន គិតចាប់តាំងពីខែកញ្ញា ឆ្នាំ២០២២ មក ដោយសារដំណើរការផលិតចុះខ្សោយ និងតម្រូវការប្រេងឥន្ធនៈទាប៕
