ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា បានឱ្យដឹងថា ក្នុងរយៈពេល៧ខែ ឆ្នាំ២០២៤ កម្ពុជាទទួលបានទឹកប្រាក់ប្រមាណ ២៨០លានដុល្លារ លើការនាំចេញអង្ករចំនួន ៣៧៩ ៥៤៦តោន ទៅកាន់ទីផ្សារអន្តរជាតិក្នុងគោលដៅចំនួន ៦៤ ប្រទេស មានកំណើនប្រមាណ ៥% បើធៀបនឹងឆ្នាំ២០២៣។
ក្នុងបទសម្ភាសន៍ជាមួយធនាគារអភិវឌ្ឍន៍ជនបទ និងកសិកម្ម (ARDB) លោកឧកញ៉ា បានឱ្យដឹងថា រយៈពេល៧ខែ ឆ្នាំ២០២៤ កម្ពុជាបាននាំចេញអង្ករចំនួនជិត ៣៨ម៉ឺនតោន បើប្រៀបធៀបរយៈពេលដូចគ្នានឹងឆ្នាំ២០២៣ គឺមានកំណើនប្រមាណ ៥%។ ក្នុងនោះលោកឧកញ៉ាសង្កេតឃើញថា មានទីផ្សារថ្មីមួយចំនួនបានកើតឡើង និងការផ្លាស់ប្តូររបត់ទីផ្សារមួយចំនួនដែរ។ សម្រាប់ទីផ្សារនៅសហគមអឺរ៉ុប ឃើញថាមានតម្រូវការខ្ពស់ជាងមុន ហើយនៅទីផ្សារសហរដ្ឋអាមេរិក ចាប់ផ្តើមទទួលយកគុណភាពអង្ករកម្ពុជាជាប្រចាំ។ ដោយឡែកឃើញថា ទីផ្សារប្រទេសចិន មានការថយចុះមួយចំនួន ដោយសារបញ្ហាអត្រាប្តូរប្រាក់ និងការប្រមូលផលក្នុងស្រុកនៅប្រទេសចិន ទទួលបានផលល្អ។ ទោះយ៉ាងណា វាជំនួសមកវិញនូវទីផ្សារតំបន់អាស៊ីអាគ្នេយ៍ ហុងកុង ជាមួយនឹងទីផ្សារអូស្ត្រាលី ដែលចាប់ផ្តើមទទួលយកទីផ្សារអង្កររបស់កម្ពុជា។
ឧកញ៉ា ចាន់ សុឃាំង បានបន្ថែមថា នៅក្នុង៧ខែ ឆ្នាំ២០២៤នេះ អង្កររបស់កម្ពុជា បានពង្រីកបានទីផ្សារថ្មីៗទៅកាន់តំបន់ ដែនកោះ និងប្រទេសចំនួន៩ ថែមទៀត រួមមាន៖ ប្រទេសជប៉ុន ចំនួន ១៤០តោន, ប្រទេសឡាតវី ៣៥០តោន, ប្រទេសលីបាណន់ ២២តោន, ប្រទេសអារ៉ាប់រួម ៣១៩តោន, ប្រទេសអាហ្វ្រិក ៥២តោន, ប្រទេសកូម៉ូរូស ២៥តោន, ម៉ាកាវ ៨៥តោន, ដែនដោះ New Celedonia ២ ១៣៥តោន និងដែនកោះ Martinique ចំនួន ៦៤តោន។
គួរបញ្ជាក់ថា ប្រភេទអង្ករកម្ពុជាដែលបាននាំចេញច្រើនជាងគេ គឺប្រភេទអង្ករក្រអូប ដែលមានចំនួនជាង ៧០%។ តាមការបញ្ជាក់ពីសហព័ន្ធស្រូវអង្ករកម្ពុជា ពូជស្រូវសែនក្រអូប ជាពូជស្រូវមិនប្រកាន់រដូវដែលត្រូវបានដាំដុះ ដោយប្រជាកសិករតាំងពីពាក់កណ្តាលទស្សវត្ស៩០។ អង្ករម៉ាកសមូហភាព SKO ផលិតចេញពីពូជស្រូវសែនក្រអូបរបស់កម្ពុជា ក៏ត្រូវបានទទួលស្គាល់ ជាពូជស្រូវល្អ និងមានរសជាតិឆ្ងាញ់ ព្រមទាំងបានឈ្នះពានរង្វាន់មាស នៅក្នុងកម្មវិធីវាយតម្លៃគុណភាព រសជាតិប្រភេទអង្ករសគ្រាប់វែងចិន-អាស៊ាន លើកទី១ កាលខែតុលា ឆ្នាំ២០២៣ ផងដែរ៕
