យោងតាមឯកសារមួយរបស់ការិយាល័យរដ្ឋាភិបាលវៀតណាម បានបង្ហាញឲ្យដឹងថា ប្រទេសរបស់ខ្លួន នឹងចាប់ផ្តើមស៊ើបអង្កេតចំពោះការអភិវឌ្ឍថាមពលនុយក្លេអ៊ែរ ដើម្បីធានាដល់សន្តិសុខថាមពលជាតិ និងគាំទ្រដល់កំណើនសេដ្ឋកិច្ចបន្ថែម។ នេះបើតាមការចុះផ្សាយពីសារព័ត៌មាន The Star។
វៀតណាម ត្រូវបានចាត់ទុកថាជាមជ្ឈមណ្ឌលឧស្សាហកម្មក្នុងតំបន់មួយដែលពឹងផ្អែកខ្លាំងលើធ្យូងថ្មសម្រាប់ផលិតថាមពល ប៉ុន្តែក្នុងពេលថ្មីៗនេះ រដ្ឋាភិបាលរបស់ខ្លួនកំពុងស្វែងរកការជំរុញផលិតកម្មថាមពលស្អាតជំនួសវិញ ដើម្បីសម្រេចបាននូវគោលដៅកាបូនសូន្យនៅត្រឹមឆ្នាំ២០៥០។
ជាមួយគ្នានេះ យោងតាមឯកសារមួយដែលបានចុះកាលពីថ្ងៃទី១២ ខែកញ្ញា បានបង្ហាញថា ក្រសួងឧស្សាហកម្ម និងពាណិជ្ជកម្មវៀតណាម នឹងធ្វើការស្រាវជ្រាវលើបទពិសោធនៃការអភិវឌ្ឍថាមពលនុយក្លេអ៊ែររបស់ប្រទេសផ្សេងៗ និងធ្វើសំណើរដើម្បីទទួលបានការអភិវឌ្ឍថាមពលនុយក្លេអ៊ែរ នៅវៀតណាម។
ឯកសារដដែលនេះបាននិយាយទៀតថា វៀតណាមមានគោលដៅបង្កើនសមត្ថភាពផលិតថាមពលរបស់ខ្លួនចន្លោះពី ១២% ទៅ ១៥% ក្នុងមួយឆ្នាំ ដើម្បីធានាបាននូវសន្តិសុខថាមពលជាតិ និងគាំទ្រដល់កំណើនសេដ្ឋកិច្ចប្រចាំឆ្នាំ ៧% ផងដែរ។
ជម្រាបជូនថា សំណើនៃអភិវឌ្ឍថាមពលនុយក្លេអ៊ែរនេះ នឹងត្រូវដាក់ជូនការិយាល័យនយោបាយ ដែលជាស្ថាប័នធ្វើការសម្រេចចិត្តដ៏មានឥទ្ធិពលបំផុតរបស់ប្រទេស ដើម្បីត្រួតពិនិត្យ៕
