កំពូលតារាចម្រៀង ខេម តារាចម្រៀងប្រចាំផលិតកម្ម Galaxy Navatra បានចេញបកស្រាយដល់សាធារណជនឱ្យបានជ្រាបថា បច្ចុប្បន្នខ្លួនជាប្រជាជនធម្មតាម្នាក់ ហើយមិនទាន់មានងារជាឧកញ៉ា ដូចពាក្យចចាមអារ៉ាមខ្លះបានលើកឡើងនោះទេ។
ការចេញមកបកស្រាយរបស់កំពូលតារាចម្រៀង ខេម បានធ្វើឡើងបន្ទាប់ពីថ្មីៗនេះ មានសារព័ត៌មានមួយចំនួន បានចុះផ្សាយថាខ្លួនកំពុងរៀបចំទទួលបានងារជាឧកញ៉ា។ ការចុះផ្សាយបែបនេះ ខេម បានលើកឡើងថា ជារឿងមិនពិតនោះទេ ហើយគេបំភ្លៃព័ត៌មានដើម្បីជាប្រយោជន៍ប៉ុណ្ណោះ។
ខេម បានបញ្ជាក់លើទំព័រហ្វេសប៊ុក កាលពីយប់ថ្ងៃទី២២ ខែកញ្ញា យ៉ាងដូច្នេះថា៖ “បងប្អូនជាទីស្រលាញ់ ថ្ងៃនេះសូមបញ្ចេញអារម្មណ៍ពិតមួយ មួយរយៈនេះមានព័ត៌មានជាច្រើន ចុះពីខ្ញុំទទួលបានងារជា ឧកញ៉ា
ខ្លះក៏ចុះថារៀបចំទទួលហើយ។ តើព័ត៌មានទាំងអស់នេះបានសំដីមកពីណា ហើយបងប្អូនមួយចំនួនក៏ជឿស្លុងតាមព័ត៌មាននោះ ខ្លះក៏បានជេរប្រមាថខ្ញុំ អ្នកខ្លះក៏អបអរសាទរ។ ហេតុអីមិនសួរខ្ញុំផង ថាតើខ្ញុំយ៉ាងមិចហើយ ហើយខ្ញុំរាល់ថ្ងៃចឹងដូចគេប្រាប់ទេ រស់នៅចំណុចណា រាល់ថ្ងៃខ្ញុំជាអ្នកចម្រៀងម្នាក់ ហើយជាប្រជាជនធម្មតាដូចបងប្អូនដែរ”។
កំពូលតារាចម្រៀង ខេម បានបញ្ជាក់បន្ថែមថា ងារជា «ឧកញ៉ា» មិនអាក្រក់នោះទេ ប៉ុន្តែរាល់ព័ត៌មានដែលមិនចេញពីមាត់របស់លោក សូមបងប្អូនកុំទាន់ជឿ ហើយអាចសួរលោកបាន។ ទោះយ៉ាងណា លោកមិនបន្ទោសបងប្អូនទេ លោកគួរបន្ទោសឬដាស់តឿនទៅខាងព័ត៌មាន ឬក៏វិបសាយនានា គួរឈប់ទៅ កុំដើម្បីប្រយោជន៍មកបំភ្លៃព័ត៌មានបែបនេះ។
សូមជម្រាបថា លោក ខេម ជាកំពូលតារាងចម្រៀងមួយរូបនៅកម្ពុជា ដែលបានប្រឡូកក្នុងវិស័យសិល្បៈចម្រៀងជាង១០ឆ្នាំមកហើយ។ ជានិច្ចកាលលោកតែងតែចូលរួមកិច្ចការងារសង្គមជាហូរហែ ពិសេសថ្មីៗនេះលោកបានដឹកនាំក្រុមបាល់ទាត់តារាកម្ពុជា ធ្វើការប្រកួតដើម្បីសប្បុរសធម៌ជាច្រើន ទាំងជាមួយថ្នាក់ដឹកនាំជាតិ និងបណ្តាខេត្តនានា ដែលធ្វើឱ្យមានមតិមួយចំនួនយល់ថា ខេម នឹងអាចទទួលបានគោរមងារឧកញ៉ា ឆាប់ៗផងដែរ៕
