រំលឹកទៅកាន់ទសវត្សឆ្នាំ ១៩៨០ វិញ នៅពេលដែលក្រុមហ៊ុនអាកាសចរណ៍ American Airlines បានប្រឈមមុខជាមួយនឹងបញ្ហាហិរញ្ញវត្ថុ ហើយពួកគេបានសម្រេចចិត្តបង្កើតកម្មវិធីពិសេសមួយ ដោយផ្តល់សំបុត្រកៅអីប្រភេទថ្នាក់ទី១ សម្រាប់ការហោះហើរពេញមួយជីវិត ឬហៅថា AAirpass ។
ជាការពិតណាស់ការផ្តល់ជូនដ៏ទាក់ទាញបំផុតបែបនេះ គឺមិនមានតម្លៃទាបនោះឡើយ ដោយសំបុត្រប្រភេទនេះ ត្រូវបានដាក់លក់នៅក្នុងតម្លៃរហូតដល់ទៅ ២៥០ ០០០ដុល្លារឯណោះ។ រហូតដល់ឆ្នាំ ១៩៨៧ បុរសម្នាក់ ដែលមានឈ្មោះថា Steve Rothstein បានសម្រេចចិត្តទិញសេវាកម្មដ៏ពិសេសនេះ។
Steve Rothstein បានអង្គុយនៅកៅអីក្រុមហ៊ុនអាកាសចរណ៍ដែលមានផាសុកភាពបំផុត រីករាយជាមួយនឹងអាហារឆ្ងាញ់ៗ និងការកម្សាន្តដ៏ល្អបំផុត ហើយថែមទាំងមិនចាំបាច់ត្រូវរង់ចាំតម្រង់ជួរនៅប្រលានយន្តហោះ ឬត្រូវព្រួយបារម្ភអំពីថ្លៃលុបចោលជើងហោះនោះឡើយ។
ប៉ុន្តែទោះជាយ៉ាងណាក៏ដោយ ក្រុមហ៊ុន American Airlines រកឃើញថា លោក Steve Rothstein បានប្រើប្រាស់សេវាកម្មហោះហើរសេរីនេះ ដល់ទៅ ១០ ០០០ ជើង និងបានធ្វើដំណើរជាង ១០ លានម៉ាយ ឬស្មើប្រមាណជាង ១៦ លានគីឡូម៉ែត្រ។ ក្នុងនោះរួមបញ្ចូលទាំងការធ្វើដំណើរចំនួន ៥០០ ជើង ទៅកាន់ចក្រភពអង់គ្លេស ៧០ ជើង ទៅកាន់ប្រទេសអូស្ត្រាលី និង ១២០ ជើង ទៅកាន់ទីក្រុងតូក្យូ ប្រទេសជប៉ុន។
រហូតដល់ឆ្នាំ ២០១៨ ក្រុមហ៊ុន American Airlines បានសម្រេចចិត្តបញ្ចប់សំបុត្ររបស់លោក Steve Rothstein វិញ ដោយសារតែខាងក្រុមហ៊ុនមិនអាចទ្រាំទ្រទៅនឹងខាតបង់រហូតដល់ទៅ ២១លានដុល្លារ ពីការធ្វើដំណើរដ៏ច្រើនលើសលុបរបស់គាត់នេះបាន៕
