នាយកប្រតិបត្តិរបស់ក្រុមហ៊ុនផលិតយន្តហោះខ្នាតយក្ស Boeing លោក Kelly Ortberg បានប្រកាសកាលពីចុងសប្តាហ៍មុនថា ក្រុមហ៊ុននឹងបញ្ឈប់បុគ្គលិកចំនួន ១៧ ០០០ នាក់ ដែលស្មើនឹង ១០% នៃកម្លាំងពលកម្មសរុបរបស់ខ្លួន ចំពេលមានកូដកម្ម ការពន្យារពេលនៃផលិតកម្ម និងការព្រួយបារម្ភអំពីសុវត្ថិភាពជាមួយនឹងយន្តហោះរបស់ខ្លួន។ នេះបើតាមការចុះផ្សាយពីសារព័ត៌មាន Reuters។
លោក Ortberg ដែលបានចូលកាន់តំណែងជា CEO ក្រុមហ៊ុនកាលពីខែសីហា បាននិយាយថា ៖”អាជីវកម្មរបស់យើងកំពុងស្ថិតក្នុងស្ថានភាពដ៏លំបាក ហើយវារឹតតែពិបាកក្នុងការបង្ហាញពីបញ្ហាដែលយើងត្រូវប្រឈមមុខដាក់គ្នា។ ការស្ដារក្រុមហ៊ុនរបស់យើងឡើងវិញ គឺត្រូវទាមទារការសម្រេចចិត្តដ៏លំបាក ហើយយើងនឹងត្រូវតែ ធ្វើការផ្លាស់ប្តូររចនាសម្ព័ន្ធមួយចំនួន ដើម្បីធានាបានថាយើងអាចរក្សាការប្រកួតប្រជែង និងផ្តល់ជូនអតិថិជនរបស់យើង ក្នុងរយៈពេលវែងទៅមុខទៀត”។
ក្រុមហ៊ុន Boeing ដែលបានរាយការណ៍ពីប្រាក់ចំណេញចុងក្រោយបំផុតរបស់ខ្លួន ក្នុងឆ្នាំ២០១៨ បានបញ្ឈប់បុគ្គលិកជាង ៣ម៉ឺននាក់ គិតចាប់ពីថ្ងៃទី១៣ ខែកញ្ញាមក។ ហើយជុំវិញការបញ្ឈប់ពីការងារនេះ ត្រូវគេព្យាករថាបានធ្វើឲ្យក្រុមហ៊ុនខាតបង់ទឹកប្រាក់ដល់ទៅ ១ពាន់លានដុល្លារក្នុងមួយខែ។
ជុំវិញការបញ្ឈប់នេះ ក៏បាននាំមកនូវកូដកម្មដ៏ធំផងដែរ រហូតឈានដល់ការផ្អាកការផលិតយន្តហោះ នៅរោងចក្រសំខាន់ៗមួយចំនួនរបស់ Boeing ដូចជានៅក្នុងទីក្រុង Seattle រដ្ឋ Washington ដែលជារដ្ឋមានបុគ្គលិកជិត ១៥០ ០០០ នាក់ កំពុងធ្វើការ។
ជម្រាបជូនថា ការបញ្ឈប់បុគ្គលិកដ៏ច្រើននេះ ត្រូវបានចាត់ទុកថាជាពេលវេលាដ៏អាក្រក់មួយរបស់ លោក Ortberg ដែលបានក្លាយជានាយកប្រតិបត្តិថ្មីរបស់ក្រុមហ៊ុន Boeing ។ លោកបានចូលកាន់តំណែងក្នុងខែសីហា ខណៈពេលដែលក្រុមហ៊ុន Boeing កំពុងរងនូវរឿងអាស្រូវជាបន្តបន្ទាប់ ជាពិសេសទាក់ទងទៅនឹងបញ្ហាសុវត្ថិភាពក្នុងពេលហោះហើរ ការពន្យារពេលផលិតកម្ម រហូតដល់មានបំណុលដល់ ៦០ពាន់លានដុល្លារ។ ខណ:ក្រុមហ៊ុន Boeing ត្រូវបានគេរាយការណ៍ថាបានខាតបង់លុយ ២៥ពាន់លានដុល្លារ គិតចាប់តាំងពីឆ្នាំ២០១៩ មក៕
