ការនាំចេញទំនិញរបស់ប្រទេសចិន ទៅកាន់រុស្ស៊ី បានកើនឡើងយ៉ាងខ្លាំងកាលពីខែមុន ដែលជាសញ្ញាមួយ បង្ហាញថារដ្ឋាភិបាលទីក្រុងម៉ូស្គូ កំពុងបន្តពឹងផ្អែកទៅលើរដ្ឋាភិបាលទីក្រុងប៉េកាំងកាន់តែខ្លាំងឡើង បន្ទាប់ពីប្រទេសទាំងពីរបានបញ្ជាក់ពីទំនាក់ទំនងសេដ្ឋកិច្ចយ៉ាងស៊ីជម្រៅរបស់ពួកគេ ក្នុងពេលកន្លងមក។ នេះបើតាមការចុះផ្សាយពីសារព័ត៌មាន Business Standard។
ចិន បាននាំចេញទំនិញតម្លៃក្នុងតម្លៃប្រហែល ៨០ពាន់លានយ៉ន់ ឬស្មើប្រមាណជាង ១១ពាន់លានដុល្លារ ទៅកាន់ប្រទេសរុស្ស៊ី នៅក្នុងខែកញ្ញា ពោលគឺបានកើនឡើង ៩% បើធៀបទៅនឹងខែសីហា។ នេះបើយោងតាមទិន្នន័យគយចិនដែលបានចេញផ្សាយពីថ្ងៃអង្គារ ទី១៥ ខែតុលាកន្លងទៅ។
ជុំវិញការកើនឡើងនៃសកម្មភាពពាណិជ្ជកម្មនេះ គឺបន្ទាប់ពីកិច្ចព្រមព្រៀងសហប្រតិបត្តិការថ្មីមួយ ត្រូវបានបានចុះហត្ថលេខារវាងប្រទេសទាំងពីរ កាលពីចុងខែសីហា ជាមួយនឹងការប្តេជ្ញាធ្វើឲ្យទំនាក់ទំនងពាណិជ្ជកម្មកាន់តែស៊ីជម្រៅ ទៅមួយកម្រិតទៀត។
ទន្ទឹមនឹងនេះ ទិន្នន័យគយចិន ក៏បង្ហាញឲ្យដឹងទៀតថា ពាណិជ្ជកម្មសរុបរវាងប្រទេសរុស្ស៊ី និងចិនបានកើនឡើងដល់ចំនួន ១,២៨ទី្រលានយ៉ន់ គិតចាប់ពីដើមឆ្នាំ រហូតដល់ខែកញ្ញា ពោលគឺបានកើនឡើង ៣,៥% បើធៀបនឹងរយៈពេលដូចគ្នា កាលពីឆ្នាំមុន៕
