មហាសេដ្ឋីកំពូលរបស់ពិភពលោក Elon Musk បានសន្យាថា លោកនឹងផ្តល់ទឹកប្រាក់ចំនួន ១លានដុល្លារ ជារៀងរាល់ថ្ងៃរហូតដល់ថ្ងៃបោះឆ្នោតប្រធានាធិបតីនៅក្នុងខែវិច្ឆិកា ទៅកាន់នរណាម្នាក់ដែលចុះហត្ថលេខាលើញ្ញត្តិតាមអ៊ីនធើណិតរបស់ខ្លួន ដែលគាំទ្រលើរដ្ឋធម្មនុញ្ញរបស់សហរដ្ឋអាមេរិក។ នេះបើតាមការចុះផ្សាយពីសារព័ត៌មាន The Telegraph។
ទន្ទឹមនឹងនេះ លោក Musk ក៏បានធ្វើតាមការសន្យារបស់ខ្លួនផងដែរ ដោយបានផ្តល់មូលប្បទានប័ត្រតម្លៃ ១លានដុល្លារ ដល់អ្នកដែលបានចូលរួមក្នុងព្រឹត្តិការណ៍ប្រមូលផ្តុំ នៅរដ្ឋ Pennsylvania កាលពីថ្ងៃទី១៩ ខែតុលា ដើម្បីគាំទ្របេក្ខជនប្រធានាធិបតីរបស់គណបក្សសាធារណរដ្ឋ លោក ដូណាល់ ត្រាំ។ ដោយអ្នកឈ្នះម្នាក់នោះ គឺបានទៅលើបុរសម្នាក់មានឈ្មោះថា John Dreher។ នេះបើតាមការឲ្យដឹងពីបុគ្កលិកនៅក្នុងព្រឹត្តិការណ៍នោះ។
គួរឲ្យដឹងផងដែរថា នេះគឺជាឧទាហរណ៍ចុងក្រោយបង្អស់របស់លោក Musk ដែលបានប្រើប្រាស់ទ្រព្យសម្បត្តិដ៏ច្រើនលើសលុបរបស់ខ្លួន ដើម្បីជះឥទ្ធិពលលើការប្រកួតប្រជែងតំណែងប្រធានាធិបតី រវាងលោក ត្រាំ និងលោកស្រី Kamala Harris ដែលជាគូប្រជែងដ៏ធំមកពីគណបក្សប្រជាធិបតេយ្យ។
ស្ថាបនិកក្រុមហ៊ុន Tesla រូបនេះ បានបង្កើត American PAC ដែលជាអង្គការសកម្មភាពនយោបាយមួយ ធ្វើឡើងដើម្បីគាំទ្រដល់យុទ្ធនាការរបស់អតីតប្រធានាធិបតី លោក ត្រាំ។ ក្រុមនេះកំពុងជួយប្រមូលនិងចុះឈ្មោះអ្នកបោះឆ្នោត នៅក្នុងរដ្ឋសមរភូមិ ប៉ុន្តែមានសញ្ញាមួយចំនួនបង្ហាញថាអង្គការនេះ កំពុងជួបបញ្ហាក្នុងការសម្រេចគោលដៅរបស់ខ្លួន។
ការប្រមូលផ្តុំនៅ Harrisburg គឺជាព្រឹត្តិការណ៍ទីបីហើយ ក្នុងរយៈពេលជាច្រើនថ្ងៃកន្លងមកនេះ ដែលធ្វើឡើងក្នុងរដ្ឋ Pennsylvania និងជាកន្លែងដែលលោក Musk កំពុងអំពាវនាវឲ្យគាំទ្របោះឆ្នោតឲ្យបានឆាប់ និងលើកទឹកចិត្តឲ្យអ្នកដទៃទៀតចូលរួម ផងដែរ។
ជម្រាបជូនថា លោក Musk ដែលត្រូវបានទស្សនាវដ្ឋី Forbes ចាត់ថ្នាក់ថាជាអ្នកមានដាច់គេលើពិភពលោក គិតដល់ពេលនេះបានផ្តល់ទឹកប្រាក់សរុបប្រមាណ ៧៥លានដុល្លារ ដល់អង្គការ PAC ដើម្បីជាជំរុញដ៏សំខាន់មួយ ក្នុងការជួយជ្រោមជ្រែង លោក ត្រាំ ទទួលតំណែងនៅក្នុងសេតវិមានឡើងវិញ៕
