ក្រុមហ៊ុន Honda កំពុងប្រមូលរថយន្តចំនួន ៧៨០ ០០០ គ្រឿង នៅសហរដ្ឋអាមេរិក មកជួសជុលវិញ បន្ទាប់ពីមានការព្រួយបារម្ភទៅលើបញ្ហាសុវត្ថិភាព ដោយសារមុខងារបូមសាំងក្នុងរថយន្តអាចនឹងប្រេះ និងលេចធ្លាយប្រេង។ នេះបើតាមការចុះផ្សាយពីសារព័ត៌មាន CNA។
ក្រុមហ៊ុនផលិតរថយន្តខ្នាតយក្សរបស់ជប៉ុននេះ បានប្រាប់ទៅកាន់ រដ្ឋបាលសុវត្ថិភាពចរាចរណ៍ផ្លូវជាតិសហរដ្ឋអាមេរិកថា ការលេចធ្លាយប្រេងឥន្ធន:នៅពេលម៉ាស៊ីនបញ្ឆេះឡើង អាចបង្ករហានិភ័យជាអគ្គីភ័យបាន។
គួរឲ្យដឹងផងដែរថា រថយន្តដែលក្រុមហ៊ុន Honda នឹងត្រូវប្រមូលយកមកជួសជុលវិញ រួមមាន Accord, CR-V Hybrid និង Honda Civic ដែលភាគច្រើនជាម៉ូដែលផលិតឆ្នាំ២០២៣ ដល់ឆ្នាំ២០២៥។ ហើយការប្រមូលមកវិញលើកនេះ រួមមានរថយន្តចំនួន ៧២០ ០០០ គ្រឿង នៅសហរដ្ឋអាមេរិក និងប្រហែល ៦១ ០០០ គ្រឿង នៅប្រទេសកាណាដា។
ជម្រាបជូនផងដែរថា ចំពោះបញ្ហានេះ ខាងក្រុមហ៊ុនរថយន្ត Honda នឹងធ្វើការត្រួតពិនិត្យឡើងវិញ និងផ្លាស់ប្តូរឧករណ៍បូមប្រេងឥន្ធនៈសម្ពាធខ្ពស់ទៅតាមការចាំបាច់ដោយមិនគិតថ្លៃ ជូនដល់អតិថិជនរបស់ខ្លួនវិញ។ នេះបើយោងតាមទីភ្នាក់ងារព័ត៌មាន Reuters៕
