ប្រទេសនៅក្នុងតំបន់អាស៊ីអាគ្នេយ៍ចំនួនបួនរួមមាន ម៉ាឡេស៊ី ឥណ្ឌូណេស៊ី វៀតណាម និងថៃ បានក្លាយជាប្រទេសដៃគូរបស់ BRICS ដែលជាក្រុមប្រទេសមានសេដ្ឋកិច្ចកំពុងរីកចម្រើនខ្លាំង។ នេះបើតាមការចុះផ្សាយពីសារព័ត៌មាន CNA។
ប្រទេសអាស៊ានទាំង៤ នេះ បានចូលរួមជាមួយប្រទេសចំនួន ៩ ផ្សេងទៀត ដែលត្រូវបានប្រកាសថាជាប្រទេសដៃគូថ្មីរបស់ BRICS រួមជាមួយ អាល់ហ្សេរី បេឡារុស្ស បូលីវី គុយបា កាហ្សាក់ស្ថាន នីហ្សេរីយ៉ា តួកគី អ៊ូហ្គង់ដា និងអ៊ូសបេគីស្ថាន ក្នុងអំឡុងកិច្ចប្រជុំកំពូលមួយ ដែលរៀបចំធ្វើឡើងនៅទីក្រុង Kazan ប្រទេសរុស្ស៊ី។
រដ្ឋមន្ត្រីការបរទេសម៉ាឡេស៊ី លោក Mohamad Hasan បានបង្ហាញក្តីសង្ឃឹមថា ឥឡូវនេះប្រទេសរបស់ខ្លួន អាចទទួលបានឱកាសពាណិជ្ជកម្មកាន់តែប្រសើរឡើង ខណៈដែលប្លុកសេដ្ឋកិច្ចដ៏ធំនេះ មានប្រជាជនសរុបចំនួនជាង ៣ ពាន់លាននាក់។
ទន្ទឹមនឹងនោះ រដ្ឋមន្ត្រីការបរទេសដែលទើបតែងតាំងថ្មីរបស់ប្រទេសឥណ្ឌូណេស៊ី លោក Sugiono ក៏បានប្តេជ្ញាចិត្តថា ខ្លួនជំរុញឲ្យមានសន្តិភាព និងសាមគ្គីភាព ក្នុងចំណោមប្រទេសកំពុងអភិវឌ្ឍន៍ នៅក្នុងកិច្ចប្រជុំកំពូលនេះ។
ដោយឡែក ប្រទេសថៃ ដែលតំណាងដោយរដ្ឋមន្ត្រីការបរទេស លោក Maris Sangiamposa ខណ:វៀតណាម តំណាងដោយនាយករដ្ឋមន្ត្រី លោក Pham Minh Chinh ដែលបានទៅចូលកិច្ចប្រជុំកំពូលនេះ ក៏បង្ហាញពីការបេ្តជ្ញាចិត្តចូលរួមជាមួយក្រុម BRICS ដើម្បីជំរុញកិច្ចសហប្រតិបត្តិការ និងការអភិវឌ្ឍ បន្ថែមទៀតផងដែរ។
ជម្រាបជូនផងដែរថា ក្រុម BRICS ត្រូវបានបង្កើតឡើងដំបូងក្នុងឆ្នាំ២០០៦ ដោយប្រទេសប្រេស៊ីល រុស្ស៊ី ឥណ្ឌា និងចិន។ អាហ្រ្វិកខាងត្បូង បានប្រកាសចូលរួមនៅឆ្នាំ២០១០ ខណៈអេហ្ស៊ីប អេត្យូពី អ៊ីរ៉ង់ និងអារ៉ាប់រួម (UAE) បានក្លាយជាសមាជិក BRICS ថ្មី នៅឆ្នាំ២០២៤ នេះ។ BRICS តំណាងឲ្យសេដ្ឋកិច្ចសរុបជាង ២៨ទ្រីលានដុល្លារអាមេរិក ឬស្មើប្រហែល ២៨% នៃសេដ្ឋកិច្ចពិភពលោក៕
