បន្ទាប់ពីហាមប្រាមមិនឲ្យក្រុមហ៊ុន Apple លក់ទូរសព្ទស៊េរីថ្មី iPhone 16 ឥណ្ឌូណេស៊ី នាថ្ងៃទី១ ខែវិច្ឆិកានេះ កំពុងបន្តហាមឃាត់ការលក់ទូរសព្ទរបស់ក្រុមហ៊ុន Alphabet បន្ថែមទៀត ព្រោះតែក្រុមហ៊ុនទាំងពីរមានហេតុផលដូចគ្នា ពោលមិនបានប្រើប្រាស់គ្រឿងបង្គុំ ដែលផលិតក្នុងស្រុករបស់ខ្លួនតាមការកំណត់។
តាមការចុះផ្សាយពីសារព័ត៌មាន Reuters បានឲ្យដឹងថា ប្រទេសឥណ្ឌូណេស៊ីបានបំបិទការលក់ទូរសព្ទ Google Pixel ដោយផ្អែកថាក្រុមហ៊ុនមិនបានអនុវត្តតាមច្បាប់ ដែលតម្រូវឲ្យក្រុមហ៊ុន ធ្វើយ៉ាងណាបំពាក់គ្រឿងបង្គុំឲ្យបានយ៉ាងហោចណាស់៤០% នៃគ្រឿងបង្គុំផលិតក្នុងប្រទេសឥណ្ឌូណេស៊ី។
គួរឲ្យដឹងថា ការបំបិទដូច្នេះ កើតឡើងមួយសប្តាហ៍បន្ទាប់ពីប្រទេសឥណ្ឌូណេស៊ី បានចាត់វិធានការនេះដូចគ្នាចំពោះការលក់ទូរសព្ទ iPhone 16 របស់ក្រុមហ៊ុន Apple ដែលមិនបានគោរពទៅតាមច្បាប់របស់ប្រទេស។
សូមជម្រាបបន្ថែមថា បើតាមការស្រាវជ្រាវពី IDC ទាំង Google ក្តីនិងទាំង Apple ក្តីមិនមែនស្ថិតនៅក្នុងចំណោមកំពូលអ្នកផលិតស្មាតហ្វូននៅឥណ្ឌូណេស៊ីនោះទេ ដោយក្រុមហ៊ុនជាប់ឈ្មោះកំពូល នៅត្រីមាសដំបូងឆ្នាំ២០២៤ គឺជាក្រុមហ៊ុនរបស់ចិន Oppo និងក្រុមហ៊ុន Samsung មកពីកូរ៉េខាងត្បូង៕
