យោងតាមកាសែត New York Times បានរាយការណ៍កាលពីថ្ងៃអាទិត្យ ទី២៤ ខែវិច្ឆិកាកន្លងទៅថា រដ្ឋាភិបាលសហរដ្ឋអាមេរិក គ្រោងកាត់បន្ថយការផ្តល់ជំនួយដំបូងចំនួន ៨,៥ពាន់លានដុល្លារ សម្រាប់ក្រុមហ៊ុនបន្ទះឈីប Intel Corp មកនៅចំនួនតិចជាង ៨ពាន់លានដុល្លារវិញ។
រំលឹកផងដែរថា កាលពីខែមីនា ឆ្នាំនេះ រដ្ឋបាលរបស់ប្រធានាធិបតីអាមេរិក ចូ បៃដិន បាននិយាយថា ខ្លួនកំពុងផ្តល់ជំនួយឥតសំណង និងប្រាក់កម្ចីដល់ក្រុមហ៊ុន Intel ក្នុងចំនួនសរុបជិត ២០ពាន់លានដុល្លារ ក្នុងគោលបំណងបង្កើនទិន្នផលបន្ទះឈីបក្នុងស្រុករបស់ក្រុមហ៊ុន និងធ្វើឲ្យសហរដ្ឋអាមេរិកក្លាយជាកន្លែងផលិតបន្ទះឈីបឈានមុខគេ។
សហរដ្ឋអាមេរិក ក៏បានប្រកាសទៀតផងដែរថា ក្នុងចំណោមកញ្ចប់ថវិកាសរុបនេះ ទឹកប្រាក់ចំនួន ៨,៥ពាន់លានដុល្លារ និងត្រូវផ្តល់ជូនជាជំនួយ ខណ:ទឹកប្រាក់ ១១ពាន់លានដុល្លារផ្សេងទៀត នឹងត្រូវផ្តល់ជាប្រាក់កម្ចី សម្រាប់ក្រុមហ៊ុន Intel ដើម្បីប្រើប្រាស់សាងសង់រោងចក្រថ្មីចំនួន២ និងធ្វើទំនើបកម្មរោងចក្រដែលមានស្រាប់។
ជម្រាបជូនផងដែរថា កញ្ចប់ជំនួយដ៏ធំសម្បើមនេះ គឺជាផ្នែកមួយនៃផែនការជំនួយបន្ទះឈីបសហព័ន្ធឆ្នាំ២០២២ របស់រដ្ឋាភិបាលសហរដ្ឋអាមេរិក ក្នុងគោលបំណងបង្កើនទិន្នផលផលិតកម្មបន្ទះឈីប Semiconductor ក្នុងស្រុក៕
