អ្នកឧកញ៉ា សួរ វីរៈ អគ្គនាយកក្រុមហ៊ុន វិរៈប៊ុនថាំ អេចប្រេស បានបង្ហើបឱ្យដឹងថា សៀវភៅមានចំណងជើង «ថៅកែវ័យក្មេង» ដែលរៀបរាប់ពីដំណើរដ៏វែងឆ្ងាយរបស់លោកផ្តើមចេញពីប្រាក់ត្រឹម ២ម៉ឺនរៀល នៅលើទឹកដីខេត្តកោះកុង គ្រោងនឹងសម្ពោធប្រកាសដាក់លក់ជាផ្លូវការ នៅថ្ងៃទី៨ ខែធ្នូ ឆ្នាំ២០២៤ ខាងមុខនេះហើយ។
នៅលើទំព័រហ្វេសប៊ុក នាល្ងាចថ្ងៃទី២៥ ខែវិច្ឆិកា ឆ្នាំ២០២៤នេះ អ្នកឧកញ៉ាអគ្គនាយក បានលើកឡើងថា ដំណើរដ៏វែងឆ្ងាយដែលផ្តើមចេញពីលុយ ២០,០០០រៀល ខ្លួនទីពឹងខ្លួន នៅលើទឹកដីខេត្តកោះកុងមកដល់ថ្ងៃនេះ ជាបទពិសោធន៍ប្រកបដោយមោទកភាព ដែលគ្មានថ្ងៃបំភ្លេចបាន តែផ្លូវដែលត្រូវរត់បន្តកាន់តែឆ្ងាយទៀតហើយ។ អ្នកឧកញ៉ា បន្ថែមទៀតថា៖ “សូមអរគុណក្រុមការងារបក្សី ដែលបានចំណាយពេលយ៉ាងយូរក្នុងការតាក់តែងសៀវភៅនេះឡើង។ ជួបគ្នាថ្ងៃទី ០៨ ធ្នូ ២០២៤ នៅផ្សារទំនើបជីបម៉ុង សុំជួយទិញម្នាក់មួយក្បាលផង”។
សៀវភៅចែករំលែកបទពិសោធន៍ជីវិតរបស់អ្នកឧកញ៉ា សួរ វីរៈ នេះនៅផ្នែកខាងមុខ មានចំណងជើងធំថា «ថៅកែវ័យក្មេង» និងខាងក្រោមភ្ជាប់ជាមួយឃ្លា «ដើរដើម្បីរក្សាលំនឹង»។ រីឯនៅផ្នែកខាងក្រោយមានទស្សនរបស់អ្នកឧកញ៉ាដ៏មានអត្ថន័យថា «ក្លាយខ្លួនជាថៅកែ ហាក់ដូចជាងាយស្រួលណាស់ មើលទៅធ្វើការងារ គ្រាន់តែស៊ីញ៉េរួចហើយចប់។ ប៉ុន្តែការពិតគឺពិបាកណាស់ ត្បិដថាមិនហត់កាយតែហត់ចិត្ត ហត់គិត ហត់បំផុតគឺពេលធ្វើជាថៅកែដំបូងៗ។ គ្មានបទពិសោធន៍ ការងារថ្មីៗមិនធ្លាប់ធ្វើ។ អ្នកអាចក្លាយជាថៅកែបានដរាបណា អ្នកមានការតាំងចិត្តខ្ពស់ ចេះបត់បែន ចេះតស៊ូតាំងមិនរាថយ មិនចុះចាញ់ឧបសគ្គទាំងឡាយដែលត្រូវឆ្លងកាត់”។
សូមជម្រាបថា អ្នកឧកញ៉ា សួរ វីរៈ ជាម្ចាស់ក្រុមហ៊ុន វិរៈប៊ុនថាំ គ្រុប ដែលបច្ចុប្បន្នមានក្រុមហ៊ុនបុត្រសម្ព័ន្ធដូចជា៖ រថយន្តជួលប្រណិត, រថយន្តក្រុងប្រណិត និង Air Bus, រថយន្តគ្រែគេងយប់ប្រណិតដំបូងគេក្នុងប្រទេសតាំងពីឆ្នាំ២០០៦, រថយន្តសម្រាប់ដឹកទំនិញ, ទូកល្បឿនលឿន Buva Sea, សណ្ឋាគារ រីស៊តជាង១០កន្លែង ដូចជា ឧទ្យានបោះតង់គីរីរម្យ, រំដួលគីរីរម្យ រីស៊ត, សារ៉ារីស៊ត, Eden Beach Resort, Tube Resort, Sandy Beach Resort, Bodega Beach Resort, Apex Koh Kong Hotel, Pidoma Resort, កោះស្តេចរីស៊ត និងកោះអភិជនរីស៊ត៕
