រដ្ឋអាជ្ញាវៀតណាម កាលពីពេលថ្មីៗនេះ បានប្រាប់មហាសេដ្ឋីអចលនទ្រព្យដ៏ធំបំផុតរបស់ប្រទេស គឺលោកស្រី Truong My Lan ថាលោកស្រីចាំបាច់ត្រូវតែផ្តល់សំណងជាទឹកប្រាក់ប្រមាណ ១១ពាន់លានដុល្លារ ប្រសិនបើលោកស្រីចង់រួចផុតពីទោសប្រហារជីវិត។ នេះបើតាមការចុះផ្សាយពីសារព័ត៌មាន Business Standard។
គួរឲ្យដឹងថា បច្ចុប្បន្នប្រធានក្រុមហ៊ុនអភិវឌ្ឍន៍អចលនទ្រព្យ Van Thinh Phat រូបនេះ កំពុងប្តឹងឧទ្ធរណ៍ចំពោះទោសប្រហារជីវិតរបស់លោកស្រី បន្ទាប់ពីត្រូវបានតុលាការសម្រេចកាត់ទោសកាលពីខែមេសា នៅក្នុងសំណុំរឿងឆបោកទឹកប្រាក់ប្រហែល ១២,៥ពាន់លានដុល្លារ ពីធនាគារ Saigon Commercial Bank ។ ទន្ទឹមនឹងនោះ លោកស្រី My Lan ក៏ត្រូវបានចោទប្រកាន់ពីបទសូកប៉ាន់មន្ត្រីរដ្ឋាភិបាល និងបំពានច្បាប់ផ្តល់ប្រាក់កម្ចីរបស់ធនាគារ ផងដែរ។
រហូតមកដល់ពេលនេះ រដ្ឋអាជ្ញាវៀតណាម បានជំទាស់នឹងការបន្ធូរបន្ថយទោសនេះ នៅក្នុងសវនាការរបស់លោកស្រី ដែលបានបន្តធ្វើឡើង នៅក្នុងទីក្រុងហូជីមិញ លុះត្រាតែលោកស្រីអាចផ្តល់មកវិញនូវសំណងជាទឹកប្រាក់មួយផ្នែកណាមួយ នៃទំហំទឹកប្រាក់ដែលត្រូវបានរកឃើញថាមានជាប់នៅក្នុងបទឆបោក តាមរយ:ការកាត់ក្តីពីរដាច់ដោយឡែកពីគ្នា។ នេះបើតាមការបញ្ជាក់របស់លោក Giang Hong Thanh ដែលជាមេធាវីតំណាងលោកស្រី My Lan។
មិនតែប៉ុណ្ណោះ លោក Thanh បាននិយាយទៀតថា៖ “ឥឡូវនេះ យើងកំពុងព្យាយាមជួយលោកស្រី My Lan ឲ្យរួចផុតពីទោសប្រហារជីវិត។ ស្របពេលក្រុមមេធាវីរបស់លោកស្រី កំពុងដំណើរការស្វែងរកជំនួយពីវិនិយោគិនបរទេស ដើម្បីជួយជម្រះបំណុលមួយចំនួនរបស់លោកស្រី”។
ជម្រាបជូនផងដែរថា នៅក្រោមច្បាប់របស់តុលាការវៀតណាម ប្រសិនបើលោកស្រី My Lan អាចប្រគល់នូវទ្រព្យសម្បត្តិបីភាគបួននៃទ្រព្យសម្បត្តិដែលត្រូវបានឃើញនៅក្នុងបទឆបោកនោះ គណៈវិនិច្ឆ័យអាចពិចារណាកាត់បន្ថយការកាត់ទោសរបស់លោកស្រីបាន៕
