រដ្ឋមន្ត្រីទេសចរណ៍ឥណ្ឌូណេស៊ី លោកស្រី Widiyanti Putri Wardhana បាននិយាយថា ក្រសួងគ្រោងនឹងស្នើបង្កើនកម្រិតថវិកាបន្ថែមដល់ចំនួន ២,២ទ្រីលានរូពៀ (ប្រហែល ១៤១លានដុល្លារ) ដើម្បីគាំទ្រដល់កម្មវិធីទេសចរណ៍ដែលជាវិស័យអាទិភាពរបស់ខ្លួន នៅឆ្នាំក្រោយ។ នេះបើតាមការចុះផ្សាយពីសារព័ត៌មាន VNA។
ថ្លែងនៅក្នុងកិច្ចប្រជុំជាមួយគណៈកម្មការទី៧ នៃសភាតំណាងឥណ្ឌូណេស៊ី នៅទីក្រុងហ្សាកាតា នាពេលថ្មីៗនេះ លោកស្រី Widiyanti បាននិយាយថា កញ្ចប់ថវិកាថ្មីនេះ នឹងត្រូវស្នើឡើង ដើម្បីបង្កើនពីចំនួនថវិកាពីមុន ដែលមានត្រឹមតែ ១,៤ទ្រីលានរូពៀប៉ុណ្ណោះ សម្រាប់ឆ្នាំ២០២៥។
ទន្ទឹមនឹងនេះ លោកស្រី Wardhana សង្កត់ធ្ងន់ទៀតថា ក្រសួងចាំចាប់ត្រូវស្នើសុំកញ្ចប់ថវិកាបន្ថែម សម្រាប់ឆ្នាំក្រោយ ខណ:ចំនួននេះ នៅតែទាបជាងខ្លាំង បើប្រៀបធៀបទៅនឹងកញ្ចប់ថវិកាដែលទទួលបានដល់ទៅជាង ៣,១ទ្រីលានរូពៀ នៅក្នុងឆ្នាំ២០២៤នេះ។
ជម្រាបជូនផងដែរថា ឥណ្ឌូណេស៊ី ដែលជាប្រទេសមានសេដ្ឋកិច្ចធំជាងគេនៅក្នុងតំបន់អាស៊ីអាគ្នេយ៍ បានទទួលបានទទួលភ្ញៀវទេសចរបរទេសសរុបជាង ១០ លាននាក់ នៅក្នុងរយ:ពេល ៩ខែដំបូងឆ្នាំនេះ ពោលគឺបានកើនឡើង ២០,២% បើធៀបទៅនឹងរយ:ពេលដូចគ្នាកាលពីឆ្នាំមុន៕
