តារា K-pop ដ៏ល្បីឈ្មោះលោក PSY និងត្រូវបានគេស្គាល់ថាជាម្ចាស់បទ “Gangnam Style” ថ្មីៗនេះ ត្រូវបានអាជ្ញាធរកូរ៉េខាងត្បូង ប្រកាសរឹបអូសបណ្តោះអាសន្ននូវផ្ទះវីឡាមួយដែលមានតម្លៃរហូតដល់ទៅ ២,២ពាន់លានវ៉ុន (១,៥៧លានដុល្លារ) ក្នុងទីក្រុងសេអ៊ូល បន្ទាប់ពីខកខានក្នុងការបង់ប្រាក់ពិន័យសម្រាប់ការសាងសង់ដោយគ្មានការអនុញ្ញាត។ នេះបើតាមការចុះផ្សាយពីសារព័ត៌មាន VN Express។
ផ្ទះវីឡានេះ ត្រូវបានរឹបអូសដោយអាជ្ញាធរតំបន់ Hannam-dong ក្នុងខែឧសភា បន្ទាប់ពីលោក PSY ខកខានក្នុងការបង់ប្រាក់ពិន័យសម្រាប់ការកែប្រែរចនាសម្ព័ន្ធ និងការផ្លាស់ប្តូរអ្នកប្រើប្រាស់អគារ។ ទោះបីជាយ៉ាងណាក៏ដោយ ការរឹបអូសនេះត្រូវបានដកចេញវិញ កាលពីខែមុន បន្ទាប់ពី PSY បានយល់ព្រមបង់ប្រាក់ពិន័យទាំងស្រុង។
ជុំវិញការរឹបអូសនេះ លោក PSY បាននិយាយថា ខ្លួនមិនបានដឹងពីការសាងសង់ដោយគ្មានការអនុញ្ញាតណាមួយនោះទេ នៅពេលដែលលោកបានទិញវីឡានោះ។
គួរឲ្យដឹងថា PSY និងភរិយាបានទិញវីឡានេះ ក្នុងឆ្នាំ២០០៨ រួមនឹងការិយាល័យតម្លៃ ៣៧២លានវ៉ុននៅតំបន់ UN Village ។ គូស្នេហ៍ទាំងពីររស់នៅទីនោះ មុនផ្លាស់ប្តូរទីលំនៅ និងជួលវាទៅឲ្យអ្នកផ្សេង នៅក្នុងឆ្នាំ២០២០។
ជម្រាបជូនថា កេរ្តិ៍ឈ្មោះរបស់ លោក PSY ត្រូវបានសាយភាយជាសាកល ក្នុងឆ្នាំ២០១២ ជាមួយនឹងការបញ្ចេញបទចម្រៀង Gangnam Style។ ហើយនៅឆ្នាំ ២០១៧ អាល់ប៊ុមចម្រៀង “4×2=8” របស់លោក បានឡើងតំណែងលេខ២ នៅលើតារាង Billboard ជាមួយនឹងការបង្កើតប្រវត្តិសាស្ត្រជាអាល់ប៊ុម K-pop ដំបូង ដែលសម្រេចបាននូវស្នាដៃបែបនេះ៕
