សមាជិកសភាអូស្ត្រាលី កាលពីពេលថ្មីៗនេះ បានឈានដល់ការដាក់ចេញច្បាប់ហាមឃាត់កុមារអាយុក្រោម ១៦ឆ្នាំ ពីប្រើប្រាស់វេទិកាប្រព័ន្ធផ្សព្វផ្សាយសង្គម និងបានស្នើសុំឲ្យមានការផាកពិន័យរាប់លានដុល្លារ ទៅលើក្រុមហ៊ុនបណ្តាញសង្គមណាដែលបំពានច្បាប់នេះ។ នេះតាមការចុះផ្សាយពីសារព័ត៌មាន AFP។
ច្បាប់ដ៏សំខាន់មួយនេះ បានឆ្លងផុតសភាជាន់ទាបរបស់អូស្រ្តាលីហើយកាលពីថ្ងៃពុធ ហើយឥឡូវត្រូវបានបន្តដាក់ជូនទៅកាន់ព្រឹទ្ធសភា ដើម្បីរង់ចាំការអនុម័តបន្ត ហើយនឹងផ្តល់ពេល ១២ខែ ដើម្បីឲ្យក្រុមហ៊ុនបណ្តាញសង្គមដោះស្រាយ មុនពេលត្រូវចូលធរមាន។
ច្បាប់ថ្មីនេះមានន័យថា បណ្តាញសង្គមធំៗរបស់ពិភពលោក ដូចជា Facebook, Instagram, TikTok និង Snapchat ត្រូវតែចាត់វិធានការជាចាំបាច់ ដើម្បីការពារកុមារពីការបង្កើតគណនី។
ក្រុមហ៊ុនប្រព័ន្ធផ្សព្វផ្សាយសង្គមធំៗ ដែលអាចប្រឈមនឹងការផាកពិន័យរហូតដល់ជាង ៣០លានដុល្លារ ចំពោះការមិនគោរពតាម បាននិយាយថាច្បាប់ថ្មីនេះ ហាក់មិនទាន់មានភាពច្បាស់លាស់ មានបញ្ហាច្រើន និងដាក់ចេញដោយប្រញាប់ប្រញាល់ពេក។
ទន្ទឹមនឹងនេះ នាយករដ្ឋមន្ត្រីអូស្ត្រាលី លោក Anthony Albanese បានប្រាប់សន្និសីទសារព័ត៌មានមួយថា ប្រព័ន្ធផ្សព្វផ្សាយសង្គមកំពុងបង្កគ្រោះថ្នាក់ដល់ក្មេងៗ ហើយលោកកំពុងជំរុញឲ្យទប់ស្កាត់យ៉ាងច្បាប់រហ័សលើបញ្ហានេះ។
ជាមួយគ្នានេះ លោក Albanese បានលើកឡើងពីហានិភ័យចំពោះសុខភាពផ្លូវកាយ និងផ្លូវចិត្តរបស់ក្មេងពីការប្រើប្រាស់ប្រព័ន្ធផ្សព្វផ្សាយសង្គមច្រើនពេក ជាពិសេសហានិភ័យចំពោះក្មេងស្រីៗពីការបង្ហាញរូបភាពរាងកាយដែលអាចបង្កគ្រោះថ្នាក់។
ជម្រាបជូនផងដែរថា បណ្តាញសង្គមមួយចំនួនផ្សេងទៀតដូចជាដូចជា WhatsApp និង YouTube អាចនឹងត្រូវបានលើកលែងជុំវិញដាក់ចេញច្បាប់ថ្មីនេះ ដោយសារតែត្រូវបានចាត់ទុកថាជាកម្មវិធីដែលកុមារអាចប្រើប្រាស់សម្រាប់ការកំសាន្ត ការងារសាលា ឬហេតុផលផ្សេងទៀត៕
