លោក Jared Isaacman ដែលជាមហាសេដ្ឋី និងជាអវកាសយានិកស៊ីវិលដំបូងគេបង្អស់របស់ពិភពលោកដែលបានដើរក្នុងលំហ កាលពីដើមឆ្នាំនេះ ត្រូវបានប្រធានាធិបតីជាប់ឆ្នោតលោក ដូណាល់ ត្រាំ ជ្រើសរើសឲ្យទៅដឹកនាំអង្គការអវកាស Nasa ។ នេះតាមការចុះផ្សាយពីសារព័ត៌មាន Reuters។
នៅក្នុងសេចក្តីថ្លែងការណ៍មួយ លោក ត្រាំ បាននិយាយថា ៖”ដោយសារចំណង់ចំណូលចិត្តរបស់ Jared សម្រាប់វិស័យអវកាស រួមទាំងបទពិសោធជាអវកាសយានិក និងការយកចិត្តទុកដាក់ខ្ពស់ក្នុងការជំរុញដល់ការរុករក ស្វែងយល់អាថ៌កំបាំងនៃសកលលោក និងការជំរុញសេដ្ឋកិច្ចអវកាសថ្មី ធ្វើឲ្យគាត់ស័ក្តិសមបំផុត ក្នុងការដឹកនាំអង្គការ NASA ឲ្យឆ្ពោះទៅកាន់យុគសម័យថ្មី”។
ទន្ទឹមនឹងនេះ លោក Isaacman ដែលជាស្ថាបនិកក្រុមហ៊ុនការពារដែនអាកាសពាណិជ្ជកម្ម Draken International ក៏បានបង្ហាញពីដឹងគុណចំពោះការផ្តល់តំណែងពីសំណាក់លោក ត្រាំ ហើយបេ្តជ្ញាប្រឹងប្រែងដឹកនាំអង្គការនេះឲ្យកាន់តែមានភាពរីកចម្រើនទៅមុខទៀត។
រំលឹកថា លោក Isaacman បានក្លាយជាអវកាសយានិកមិនអាជីពដំបូងគេ ដែលបានបណ្តែតខ្លួនក្នុងលំហអវកាស តាមរយ:ការធ្វើដំណើរក្នុងយានអវកាសរបស់ក្រុមហ៊ុន SpaceX ដើម្បីដាក់ខ្លួនចូលទៅក្នុងទីលំហអវកាសដែលស្ថិតនៅចម្ងាយប្រមាណ ៧០០គីឡូម៉ែត្រពីផ្ទៃផែនដី។ បេសកកម្មរបស់ក្រុមហ៊ុន SpaceX នេះ មានឈ្មោះថា Polaris Dawn មានគោលដៅធ្វើតេស្តសំលៀកបំពាក់របស់អវកាសយានិក ដែលជាផ្នែកមួយនៃគម្រោងការធំៗផ្សេងទៀត របស់ក្រុមហ៊ុន SpaceX។
ជម្រាបជូនផងដែរថា លោក Isaacman នឹងត្រូវស្នងតំណែងបន្តពីអ្នកគ្រប់គ្រងអង្គការ Nasa បច្ចុប្បន្ន គឺលោក Bill Nelson ដែលជាអតីតអ្នកបើកយានអវកាស និងជាសមាជិកព្រឹទ្ធសភាមកពីគណបក្សប្រជាធិបតេយ្យសម្រាប់រដ្ឋ Florida ដែលត្រូវបានតែងតាំងដោយប្រធានាធិបតី ចូ បៃដិន កាលពីឆ្នាំ២០២១៕
