យោងតាមមន្រ្តីក្រសួងយុត្តិធម៌ បាននិយាយកាលពីថ្ងៃទី៩ ខែវិច្ឆិកាកន្លងទៅថា ប្រធានាធិបតីកូរ៉េខាងត្បូង លោក Yoon Suk Yeol ត្រូវបានហាមឃាត់មិនឲ្យធ្វើដំណើរចាកចេញពីប្រទេសនោះឡើយ ចំពេលមានការអំពាវនាវកាន់តែខ្លាំងឡើង ដើម្បីឲ្យរូបលោកចុះចេញពីតំណែង។ នេះបើតាមការចុះផ្សាយពីសារព័ត៌មាន Reuters។
យោងតាមការចុះផ្សាយពីសារព័ត៌មានក្នុងស្រុក បានឲ្យដឹងទៀតថា លោក Yoon បានក្លាយជាគោលដៅមួយនៅក្នុងការស៊ើបអង្កេត ជុំវិញការប្រកាសចេញច្បាប់អាជ្ញាសឹកដ៏គួរឲ្យភ្ញាក់ផ្អើលបំផុតមួយ មុនពេលសម្រេចលុបចោលវិញ នៅត្រឹមតែប៉ុន្មានម៉ោងក្រោយ ស្របពេលមេដឹកនាំរូបនេះ ត្រូវបានរងការចោទប្រកាន់ពីបទរំលោភអំណាច និងបទចោទប្រកាន់ផ្សេងៗមួយចំនួនទៀត។
មិនតែប៉ុណ្ណោះ ក្នុងអំឡុងកិច្ចប្រជុំមួយនៅក្នុងសភា លោក Oh Dong-woon ប្រធានការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ (CIO) បានស្នើឲ្យមានការរឹតត្បិតចំពោះការធ្វើដំណើររបស់ប្រធានាធិបតីលោក Yoon Suk Yeol ។
ទន្ទឹមនឹងនេះ រដ្ឋមន្ត្រីក្រសួងយុត្តិធម៌ លោក Bae Sang-up បានប្រាប់គណៈកម្មាធិការជាតិថា ដីកាហាមឃាត់ការធ្វើដំណើររបស់លោក Yoon នេះ ត្រូវបានអនុម័ត ដើម្បីបន្តដំណើរការស៊ើបអង្កេតជុំវិញបទចោទប្រកាន់ខាងលើ។
ជម្រាបជូនផងដែរថា លោក Yoon បានចេញមុខសុំទោសចំពោះការដាក់ចេញច្បាប់អាជ្ញាសឹករបស់ខ្លួននេះ ហើយបាននិយាយថា លោកនឹងដកខ្លួនចេញពីកិច្ចការងាររដ្ឋផ្សេងៗ ដែលរួមមានទាំងកិច្ចការការទូត ផងដែរ ដោយនឹងប្រគល់តួនាទីទាំងនេះទៅឲ្យគណបក្សអំណាចប្រជាជន (PPP) រាប់រងជំនួសវិញ ប៉ុន្តែលោកមិនទាន់លាលែងពីតំណែងជាប្រធានាធិបតីនៅឡើយនោះទេ៕
