ក្រុមហ៊ុន Honda និង Nissan ត្រូវបានគេរាយការណ៍ថា កំពុងស្ថិតនៅក្នុងការពិភាក្សាគ្នាអំពីការបង្កើតក្រុមហ៊ុនថ្មីមួយ ដើម្បីជួយពួកគេក្នុងការប្រកួតប្រជែងទៅនឹងក្រុមហ៊ុនផលិតរថយន្តអគ្គិសនី ជាពិសេសនៅក្នុងប្រទេសចិន។ នេះបើតាមការចុះផ្សាយពីសារព័ត៌មាន BBC។
បើតាមប្រភពដដែល បានបង្ហាញឲ្យដឹងទៀតថា ការពិភាក្សានេះកំពុងស្ថិតនៅក្នុងដំណាក់កាលដំបូងនៅឡើយ ហើយមិនទាន់មានការធានាថាកិច្ចព្រមព្រៀងណាមួយនឹងត្រូវបានយល់ព្រមនោះទេ។
គួរឲ្យដឹងផងដែរថា កាលពីខែមីនា ក្រុមហ៊ុនផលិតរថយន្តខ្នាតយក្សរបស់ប្រទេសជប៉ុនទាំងពីរ បានយល់ព្រមស្វែងរកភាពជាដៃគូយុទ្ធសាស្ត្រ នៅក្នុងអាជីវកម្មរថយន្ត EV រួមគ្នា។ ហើយនៅក្នុងខែសីហា Honda និង Nissan ក៏បានពង្រឹងទំនាក់ទំនងរបស់ពួកគេ ដោយយល់ព្រមធ្វើការជាមួយគ្នាលើការផលិតអាគុយ និងបច្ចេកវិទ្យាផ្សេងទៀត ផងដែរ។
ទន្ទឹមនឹងនេះ ក្រុមហ៊ុនទាំងពីរបាននិយាយនៅក្នុងសេចក្តីថ្លែងការណ៍មួយដូចគ្នាថា ៖”ដូចដែលបានប្រកាសនៅក្នុងខែមីនាឆ្នាំនេះ ក្រុមហ៊ុន Honda និង Nissan កំពុងស្វែងរកលទ្ធភាពផ្សេងៗសម្រាប់កិច្ចសហការនាពេលអនាគត ដោយប្រើប្រាស់ធនធានផលិតកម្មរបស់គ្នាទៅវិញទៅមក”។
ប៉ុន្តែទោះជាយ៉ាងណាក៏ដោយ កិច្ចព្រមព្រៀងដ៏ធំនេះ ទំនងជាអាចស្ថិតក្រោមការត្រួតពិនិត្យផ្នែកនយោបាយយ៉ាងតឹងតែងនៅក្នុងប្រទេសជប៉ុន ព្រោះវាអាចនាំឲ្យមានការកាត់បន្ថយការងារជាច្រើន។ មិនតែប៉ុណ្ណោះ Nissan ក៏ទំនងជាប្រឈមនឹងការបង្អាក់សម្ព័ន្ធភាពរបស់ខ្លួន ជាមួយនឹងក្រុមហ៊ុនផលិតរថយន្តខ្នាតយក្សរបស់បារាំង Renault ផងដែរ។
ជម្រាបជូនផងដែរថា ក្រោយលេចឡើងព័ត៌មាននៃការបង្កើតក្រុមហ៊ុនរួមគ្នានេះ បានធ្វើឲ្យភាគហ៊ុនរបស់ Nissan បានកើនឡើងច្រើនជាង ២៣% នៅក្នុងទីផ្សារហ៊ុនទីក្រុងតូក្យូកាលពីថ្ងៃពុធ ខណ:ភាគហ៊ុនរបស់ក្រុមហ៊ុន Honda បានធ្លាក់ចុះប្រហែល ៣% ស្របពេលភាគហ៊ុនរបស់ក្រុមហ៊ុន Mitsubishi បានកើនឡើងជិត ២០%៕
