លោក ត្រាំ គំរាមយកពន្ធលើសហភាពអឺរ៉ុប បើមិនព្រមទិញប្រេង និងឧស្ម័នរបស់អាមេរិកបន្ថែម

ប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ បានគំរាមសហភាពអឺរ៉ុប ជាមួយនឹងការដាក់ពន្ធគយ ប្រសិនបើប្រទេសជាសមាជិករបស់ប្លុកនេះមិនព្រមទិញប្រេង និងឧស្ម័នរបស់អាមេរិកបន្ថែមទេនោះ។ នេះបើតាមការចុះផ្សាយពីសារព័ត៌មាន Bloomberg។

លោក ត្រាំ បាននិយាយនៅលើបណ្តាញទំនាក់ទំនងសង្គម Truth Social របស់ខ្លួនកាលពីពេលថ្មីៗនេះថា ៖”ខ្ញុំបានប្រាប់សហភាពអឺរ៉ុបថា ពួកគេត្រូវតែបង្កើតឱនភាពដ៏ច្រើនរបស់ពួកគេជាមួយសហរដ្ឋអាមេរិក តាមរយៈការទិញប្រេង និងឧស្ម័នរបស់យើងទ្រង់ទ្រាយធំ។ បើមិនដូច្នេះទេ ខ្ញុំនឹងចាប់ផ្តើមដាក់ពន្ធគយលើទំនិញរបស់ពួកគេទាំងអស់” ។

សហរដ្ឋអាមេរិក គឺជាប្រទេសផលិតប្រេងឆៅដ៏ធំបំផុតរបស់ពិភពលោក និងជាប្រទេសនាំចេញឧស្ម័នធម្មជាតិរាវ (LNG) ធំបំផុតមួយផងដែរ។ អ្នកទិញចូលហ្គាស់ LNG ធំៗ រួមទាំង EU និងវៀតណាម បានចាប់ផ្តើមបើកការពិភាក្សារួចហើយ អំពីការទិញឥន្ធនៈបន្ថែមពីសហរដ្ឋអាមេរិក ដែលជាផ្នែកមួយដើម្បីទប់ស្កាត់ការគំរាមកំហែងនៃផែនការពន្ធថ្មីរបស់លោក ត្រាំ។

គួរឲ្យដឹងផងដែរថា ក្នុងឆ្នាំ២០២២ ការនាំចេញទំនិញរបស់សហរដ្ឋអាមេរិកទៅកាន់សហភាពអឺរ៉ុប មានចំនួនសរុបប្រមាណ ៣៥០,៨ពាន់លានដុល្លារ កើនឡើង ២៨,៨% ធៀបនឹងឆ្នាំ២០២១ ។នេះបើយោងតាមទិន្នន័យពីរដ្ឋាភិបាលសហរដ្ឋអាមេរិក។

ទន្ទឹមនឹងនេះ ការនាំចូលទំនិញរបស់សហរដ្ឋអាមេរិក ពីសហភាពអឺរ៉ុបវិញ មានចំនួន ៥៥៣,៣ពាន់លានដុល្លារក្នុងឆ្នាំដដែល កើនឡើង ១២,៨% ពីឆ្នាំ២០២១។ ឱនភាពពាណិជ្ជកម្មទំនិញរបស់សហរដ្ឋអាមេរិកជាមួយសហភាពអឺរ៉ុប មានចំនួន ២០២,៥ពាន់លានដុល្លារក្នុងឆ្នាំ២០២២ ធ្លាក់ចុះ ៧,៣% ពីឆ្នាំ២០២១។

ជម្រាបជូនផងដែរថា ក្រៅតែពីសហភាពអឺរ៉ុប លោក ត្រាំ ក៏បានធ្វើការគំរាមម្តងហើយម្តងទៀតថានឹងដាក់ពន្ធសំខាន់ៗលើប្រទេសដូចជាប្រទេសចិន កាណាដា និងម៉ិកស៊ិក ក្នុងរយៈពេលប៉ុន្មានខែថ្មីៗនេះ៕