គ្រឹះស្ថានធនាគារ និងហិរញ្ញវត្ថុ ផ្តល់ឥណទានក្នុងវិស័យសេដ្ឋកិច្ចមានចំនួន ៦០,៩ ប៊ីលានដុល្លារអាមេរិក ក្នុងរយៈពេល១០ ខែឆ្នាំនេះ

គិតត្រឹមខែតុលា ឆ្នាំ២០២៤ ឥណទានផ្តល់ដោយគ្រឹះស្ថានធនាគារ និងហិរញ្ញវត្ថុទៅក្នុងវិស័យសេដ្ឋកិច្ចមានចំនួន ២៤៧.៦៣១ ប៊ីលានរៀល (ស្មើនឹង ៦០,៩ ប៊ីលានដុល្លារអាមេរិក) កើន ២,២% ធៀបនឹងឆ្នាំមុន។នេះបើតាមេបាយការណ៍របស់ធនាគារជាតិនៃកម្ពុជា នៅថ្ងៃទី២៤ ខែធ្នូ ឆ្នាំ២០២៤។

របាយការណ៍ធនាគារជាតិនៃកម្ពុជា បានឱ្យដឹងថា ឥណទានជាប្រភពទុនដ៏សំខាន់សម្រាប់អ្នកប្រើប្រាស់ និងក្រុមហ៊ុនសហគ្រាសក្នុងការពង្រីកអាជីវកម្ម និងដើរតួនាទីយ៉ាងសំខាន់ក្នុងការគាំទ្រដល់សកម្មភាពសេដ្ឋកិច្ច បង្កើតឱកាសការងារ និងបង្កើនផលិតភាព។

បើគិតត្រឹមខែតុលា ឆ្នាំ២០២៤ ឥណទានផ្តល់ដោយគ្រឹះស្ថានធនាគារ និងហិរញ្ញវត្ថុទៅក្នុងវិស័យសេដ្ឋកិច្ចមានចំនួន ២៤៧.៦៣១ ប៊ីលានរៀល (ស្មើនឹង ៦០,៩ ប៊ីលានដុល្លារអាមេរិក) កើន ២,២% ធៀបនឹងឆ្នាំមុន។

បើតាមធនាគារជាតិ បានគូសបញ្ជាក់ថា ការកើនឡើងនេះរួមចំណែកចម្បងដោយកំណើនឥណទានទៅកាន់វិស័យជួញដូរដុំ និងរាយ សំណង់ អចលនទ្រព្យ កម្មន្តសាល និងវិស័យផ្សេងៗទៀត។

សូមបញ្ជាក់ថា ទំហំឥណទានតាមវិស័យសេដ្ឋកិច្ចគិតចាប់ពីខែមករា ដល់ខែតុលា ឆ្នាំ២០២៤ រួមមាន ការជួញដូរដុំ និងរាយ មាន៦០.៩២៥ប៊ីលានរៀល សំណង់ ២៧.១៩៩ប៊ីលានរៀល ការទិញផ្ទះជាកម្មសិទ្ធិផ្ទាល់ខ្លួន ២៧.៦៨៩ប៊ីលានរៀល អចលនទ្រព្យ ២៤.៨៦៣ប៊ីលានរៀល កសិកម្ម ២៣.៧៥៩ប៊ីលានរៀល សេវាកម្ម ១៩.៥៨៦ប៊ីលានរៀល កម្មន្តសាល ១០.៣៦៧ប៊ីលានរៀល អង្គភាពគ្រួសារ ២.៥៩១ប៊ីលានរៀល និងផ្សេងៗ ៤៨.៦៥៤ប៊ីលានរៀល៕