ប្រទេសម៉ិកស៊ិក នឹងដាក់ពន្ធបន្ថែមដល់ ៣៦,២៣% លើការនាំចូលដែកលួសដែលប្រើសម្រាប់ការផ្សារដែក ពីប្រទេសវៀតណាម ក្រោយចោទប្រកាន់ថាប្រទេសក្នុងតំបន់អាស៊ានមួយនេះ កំពុងធ្វើឲ្យប៉ះពាល់ដល់អ្នកផលិតក្នុងស្រុក។ នេះបើតាមការចុះផ្សាយពីសារព័ត៌មាន Bloomberg។
ក្រសួងសេដ្ឋកិច្ចម៉ិកស៊ិក បានបាននិយាយថាវៀតណាម ថាកំពុងធ្វើឲ្យមានភាពជន់ជោរនៃដែកលួសនៅក្នុងប្រទេសម៉ិកស៊ិក ដោយសារតែផលិតផលរបស់ពួកគេមានតម្លៃទាបជាងទីផ្សារ។ ការសម្រេចចិត្តដែលត្រូវបានប្រកាសកាលពីថ្ងៃចន្ទនៅក្នុងសារព័ត៍មានជាតិ គឺជាវិធានការចុងក្រោយរបស់ម៉ិកស៊ិក ដើម្បីកំណត់ការនាំចូលផលិតផលពីអាស៊ី បន្ទាប់ពីបានដាក់ពន្ធលើផលិតផលដែកថែប និងលើសម្លៀកបំពាក់ថោកៗរបស់ចិន ផងដែរ។
ទន្ទឹមនឹងនេះ រដ្ឋាភិបាលម៉ិកស៊ិក បាននិយាយទៀតថា ខ្លួនបានធ្វើការស៊ើបអង្កេតលើទំនិញដែកលួសរបស់វៀតណាម ចាប់តាំងពីចុងឆ្នាំ២០២៣ មកម្លេះ បន្ទាប់ពីក្រុមហ៊ុនម៉ិកស៊ិក Electrodos Infra SA de CV និង Plasticos y Alambres SA de CV បានត្អូញត្អែរអំពីការនាំចូលដែលមានតម្លៃអយុត្តិធម៌។
នៅក្នុងសេចក្តីប្រកាសរបស់ខ្លួន ក្រសួងសេដ្ឋកិច្ចបានដាក់ឈ្មោះក្រុមហ៊ុនវៀតណាម Kim Tin Group Corporation ថាបានចូលរួមក្នុងការកំណត់តម្លៃដោយអយុត្តិធម៌ ប៉ុន្តែការអនុវត្តលើច្បាប់ពន្ធគយថ្មីនេះ នឹងត្រូវអនុវត្តយ៉ាងទូលំទូលាយចំពោះអ្នកនាំចេញរបស់វៀតណាមទាំងអស់។
ជម្រាបជូនផងដែរថា ចំណែកទីផ្សាររបស់អ្នកផលិតដែកលួស នៅម៉ិកស៊ិក បានធ្លាក់ចុះយ៉ាងខ្លាំងក្នុងប៉ុន្មានឆ្នាំថ្មីៗនេះ ខណៈចំណែកទីផ្សាររបស់អ្នកនាំចូលវៀតណាម បានកើនឡើងច្រើនជាង ១០% ដល់ ១៨,៦% នៅឆ្នាំ២០២៣។ នេះបើយោងតាមទិន្នន័យពីក្រសួងសេដ្ឋកិច្ចម៉ិកស៊ិក៕
