យោងតាមនាយកដ្ឋានពាណិជ្ជកម្មបរទេស បានបង្ហាញឲ្យដឹងថា ការនាំចេញថាមពលអគ្គិសនី បានបន្តក្លាយជាការបង្កើតប្រាក់ចំណូលដ៏ធំបំផុតនៅក្នុងពាណិជ្ជកម្មរបស់ប្រទេសឡាវ នៅក្នុងឆ្នាំ២០២៤ កន្លងទៅ ដោយបង្កើតបានជិត ៩៨០លានដុល្លារ ឬស្មើទៅនឹង ១៥,៣៥% នៃការនាំចេញសរុប។ នេះបើតាមការចុះផ្សាយពីសារព័ត៌មាន The Star។
ទំហំពាណិជ្ជកម្មសរុបរបស់ប្រទេសឡាវ សម្រាប់ឆ្នាំ២០២៤ សម្រេចបាន ១៦,៣៥ពាន់លានដុល្លារ ដោយការនាំចេញមានតម្លៃ ៨,១៤ពាន់លានដុល្លារ និងការនាំចូលមានតម្លៃ ៨,២១ ពាន់លានដុល្លារ។ ចំនួននេះបណ្តាលឲ្យមានឱនភាពពាណិជ្ជកម្មប្រហែល ៦៤លានដុល្លារ។
ក្រៅពីថាមពលអគ្គិសនី ការនាំចេញសំខាន់ៗរបស់ប្រទេសក្នុងតំបន់អាស៊ានមួយនេះ រួមមាន អំបិល រ៉ែប៉ូតាស្យូម មាស ឧបករណ៍អគ្គិសនី កៅស៊ូ និងក្រដាស ជាដើម ស្របពេលទីផ្សារនាំចេញសំខាន់ៗ គឺប្រទេសចិន ថៃ និងវៀតណាម ដែលរួមគ្នាមានចំនួនជាង ៨០% នៃការនាំចេញសរុបរបស់ប្រទេសឡាវ។
ទន្ទឹមនឹងនេះ ចំពោះផ្នែកនាំចូលវិញ ទំនិញចម្បងៗរួមមានប្រេងម៉ាស៊ូត គ្រឿងម៉ាស៊ីន និងយានជំនិះ ក្នុងនោះប្រទេសថៃ និងចិន ជាដៃគូនាំចូលធំជាងគេបំផុត។
ជម្រាបជូនផងដែរថា នៅក្នុងឆ្នាំ២០២៣ ការនាំចេញថាមពលអគ្គិសនី បានឈរនៅលំដាប់កំពូលក្នុងបញ្ជី ដែលរួមចំណែកបាន ២,៣៨ពាន់លានដុល្លារដល់ប្រាក់ចំណូលនាំចេញសរុបរបស់ប្រទេសឡាវ។ នេះបើតាមទិន្នន័យទទួលបានពីកាសែត Laotian Times៕
