ប្រធានាធិបតីអាមេរិកលោក ដូណាល់ ត្រាំ ដែលទើបស្បថចូលកាន់តំណែងកាលពីម្សិលមិញ បានបញ្ជាឲ្យផ្អាកលើការអនុវត្តច្បាប់ដែលនឹងត្រូវហាមឃាត់កម្មវិធី TikTok នៅក្នុងទឹកដីសហរដ្ឋអាមេរិក ជាបណ្តោះអាសន្នរយ:ពេល ៧៥ថ្ងៃ។ នេះបើតាមការចុះផ្សាយពីសារព័ត៌មាន CNA។
នៅក្រោមបទបញ្ជានេះ លោក ត្រាំ បានណែនាំដល់អគ្គមេធាវីរបស់សហរដ្ឋអាមេរិក មិនត្រូវអនុវត្តវិធានការណាមួយប្រឆាំងទៅនឹង TikTok ក្នុងរយ:ពេល ៧៥ថ្ងៃនោះឡើយ ពោលគឺបន្ទាប់ពីច្បាប់ហាមឃាត់ថ្មីមួយសន្តីពីការការពារជនជាតិអាមេរិកពីកម្មវិធីដែលគ្រប់គ្រងដោយគូប្រជែងបរទេស (PAFACA ) ត្រូវបានចូលជាធរមានកាលពីថ្ងៃទី១៩ ខែមករា។
រម្លឹកផងដែរថា TikTok បានបិទដំណើរការកម្មវិធីរបស់ខ្លួន នៅសហរដ្ឋអាមេរិកកាលពីថ្ងៃអាទិត្យកន្លងទៅ បន្ទាប់ពីច្បាប់ហាមឃាត់ដែលត្រូវបានចុះហត្ថលេខាដោយអតីតប្រធានាធិបតី លោក ចូ បៃដិន កាលពីឆ្នាំមុន ឈានដល់ពេលកំណត់។
ប៉ុន្តែទោះជាយ៉ាងណាក៏ដោយ TikTok បានស្ដារសេវាកម្មរបស់ខ្លួននៅក្នុងទឹកដីសហរដ្ឋអាមេរិកឡើងវិញ បន្ទាប់ពីទទួលបានការអន្តរាគម៍ពីសំណាក់ លោក ដូណាល់ ត្រាំ ខណ:លោកថែមទាំងបានសន្យាថានឹងចេញបទបញ្ជាប្រតិបត្តិភ្លាមៗនៅពេលលោកចូលកាន់តំណែងជាផ្លូវការ ដើម្បីពន្យារពេលលើការហាមឃាត់នេះ។
ទន្ទឹមនឹងនេះ លោក ត្រាំ បាននិយាយទៀតថា បទបញ្ជាប្រតិបត្តិលើកម្មវិធី TikTok នេះ បានផ្តល់ឲ្យលោកនូវសិទ្ធិអំណាចក្នុងការលក់ ឬបិទវាចោល ប៉ុន្តែនៅក្នុងពេលនេះលោកមិនទាន់សម្រេចចិត្តថា តើត្រូវបន្តជម្រើសមួយណានៅឡើយនោះទេ។
ជម្រាបជូនផងដែរថា ច្បាប់ PAFACA ត្រូវបានធ្វើឡើងដើម្បីហាមឃាត់មិនឲ្យកម្មវិធី TikTok ដំណើរការនៅសហរដ្ឋអាមេរិក លុះត្រាតែក្រុមហ៊ុនមេ ByteDance យល់ព្រមលក់ប្រតិបត្តិការ TikTok នៅអាមេរិករបស់ខ្លួនទៅឲ្យក្រុមហ៊ុន ឬបុគ្គលអាមេរិក ដោយសម្អាងលើហេតុផលបញ្ហសន្តិសុខជាតិ៕
