លោក Akira SASAKI នាយកគ្រប់គ្រងក្រុមហ៊ុន Inoue Calcium Corporation របស់ជប៉ុន បានចូលជួបពិភាក្សាការងារជាមួយលោក សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ កាលពីថ្ងៃទី២៩ ខែមករា ឆ្នាំ២០២៥។
កិច្ចពិភាក្សានេះ បានផ្តោតសំខាន់លើ ការជំរុញសក្តានុពលនាំចេញគ្រាប់ស្វាយចន្ទីកែច្នៃ និងម្រេចកម្ពុជាទៅកាន់ទីផ្សារជប៉ុន។ លើសពីនេះ ក៏សិក្សាពីឱកាសវិនិយោគក្នុងវិស័យកែច្នៃកសិផលនៅកម្ពុជា ក្នុងការលើកកម្ពស់ការប្រកួតប្រជែងនៃផលិតផលកសិកម្មកម្ពុជា ដោយធានាស្តង់ដារខ្ពស់ក្នុងការកែច្នៃ និងការពង្រីកទីផ្សារ លើកកម្ពស់សក្ដានុពលនៃការច្នៃប្រឌិត និងអនុលោមភាពនៃស្តង់ដារទីផ្សារជប៉ុនផងដែរ។
សូមបញ្ជាក់ថា កន្លងមកប្រទេសជប៉ុនគឺជាប្រទេសមួយដែលមានការចាប់អារម្មណ៍ និងកំពុងវិនិយោគលើវិស័យស្វាយចន្ទី ជាពិសេសការកែច្នៃគ្រាប់ស្វាយចន្ទីគួរឱ្យកត់សម្គាល់នៅកម្ពុជា។
លោក អួន ស៊ីឡុត ប្រធានសមាគមស្វាយចន្ទីកម្ពុជា ធ្លាប់បានឱ្យដឹងថា កន្លងទៅកម្ពុជាមិនអាចផលិតគ្រាប់ស្វាយចន្ទីដើម្បីបំពេញតម្រូវការជប៉ុនបានទេ ដោយសារជប៉ុនត្រូវការច្រើន ខណៈកម្ពុជាផលិតបានតិចតួចនៅឡើយ។
ចំំណែកឯម្រេចវិញ បច្ចុប្បន្នម្រេចកំពតកម្ពុជាអាចនាំចេញទៅទីផ្សារបរទេសដូចជា កូរ៉េ ចិន ជប៉ុន អឺរ៉ុប អាមេរិក ជាដើម។ គិតក្នុងឆ្នាំ២០២៤ កម្ពុជារកចំណូលពីការនាំចេញម្រេចទៅអន្តរជាតិប្រមាណ ៣៥,២៧លានដុល្លារ កើនឡើងជាង១៣១ភាគរយ ធៀបនឹងឆ្នាំ២០២៣ ដែលមានទឹកប្រាក់១៥,២៣ លានដុល្លារ៕
