សេតវិមាន៖ នាយរដ្ឋមន្ត្រីឥណ្ឌា ត្រូវបានអញ្ជើញឲ្យជួបជាមួយ លោក​ ត្រាំ នៅសប្តាហ៍ក្រោយ

យោងតាមមន្ត្រីសេតវិមានមួយបានឲ្យដឹងថា ប្រធានាធិបតីអាមេរិកលោក ដូណាល់ ត្រាំ បានអញ្ជើញនាយករដ្ឋមន្ត្រីឥណ្ឌា លោក Narendra Modi មកទស្សនកិច្ចនៅសេតវិមាន នៅសប្តាហ៍ក្រោយ។ នេះបើតាមការចុះផ្សាយពីសារព័ត៌មាន Reuters។

រម្លឹកផងដែរថា លោក ត្រាំ បាននិយាយជាមួយលោក Modi កាលពីថ្ងៃទី២៧ ខែមករា នៅពេលដែលលោក បានពិភាក្សាអំពីបញ្ហាអន្តោប្រវេសន៍ និងបានសង្កត់ធ្ងន់លើសារៈសំខាន់នៃការទិញ​សម្ភារ​យោធាដែលផលិតដោយអាមេរិកបន្ថែមទៀត ព្រមទាំងទំនាក់ទំនងពាណិជ្ជកម្មទ្វេភាគីដែលស្មើភាពគ្នា ផងដែរ។

ឥណ្ឌា ដែលជាដៃគូយុទ្ធសាស្ត្ររបស់សហរដ្ឋអាមេករិក ក្នុងកិច្ចខិតខំប្រឹងប្រែងទប់ទល់នឹងប្រទេសចិន មានបំណងចង់ពង្រឹងទំនាក់ទំនងពាណិជ្ជកម្មជាមួយសហរដ្ឋអាមេរិក ហើយចង់ស្វែងរកភាពងាយស្រួលបន្ថែមមទៀត សម្រាប់ពលរដ្ឋរបស់ខ្លួន ក្នុងការទទួលបានទិដ្ឋាការកម្មករជំនាញ។

មិនតែប៉ុណ្ណោះ រដ្ឋាភិបាលទីក្រុងញូវដេលី ក៏មានបំណងចង់ជៀសវាងនូវការដាក់ពន្ធគយណាមួយដែលលោក ត្រាំ ធ្លាប់បានគំរាមកំហែងនាពេលកន្លងមក ដោយលើកឡើងពីការយកពន្ធខ្ពស់របស់ឥណ្ឌា លើទំនិញអាមេរិក។

ជម្រាបជូនផងដែរថា សហរដ្ឋអាមេរិក គឺជាដៃគូពាណិជ្ជកម្មដ៏ធំបំផុតរបស់ឥណ្ឌា ខណ:ពាណិជ្ជកម្មទ្វេភាគីរវាងប្រទេសទាំងពីរ បានកើនឡើងលើសពី ១១៨ពាន់លានដុល្លារ ក្នុងឆ្នាំ២០២៣ និង២០២៤ ដោយក្នុងនោះឥណ្ឌាទទួលបានអតិរេកពាណិជ្ជកម្មដល់ទៅ ៣២ពាន់លានដុល្លារ៕