យោងតាមក្រុមអ្នកវិភាគជាច្រើន បានបង្ហាញឲ្យដឹងថា សង្រ្គាមពាណិជ្ជកម្មដែលកំពុងកើតឡើងរវាងសហរដ្ឋអាមេរិក និងចិន អាចជំរុញឱ្យការនាំចេញប្រេងឆៅរបស់សហរដ្ឋអាមេរិកនៅឆ្នាំ២០២៥ ធ្លាក់ចុះ ជាលើកដំបូងគិតចាប់តាំងពីមានជំងឺរាតត្បាតកូវីដ-១៩ មក។ នេះបើតាមការចុះផ្សាយពីសារព័ត៌មាន Reuters។
ទស្សនវិស័យនោះ ហាក់កំពុងឆ្លុះបញ្ចាំងពីផលវិបាកដែលមិននឹកស្មានដល់នៃគោលនយោបាយគាំពារនិយមរបស់ប្រធានាធិបតី លោក ដូណាល់ ត្រាំ ដែលកំពុងដំណើរការប្រឆាំងនឹងការប្តេជ្ញារបស់រដ្ឋបាលរបស់លោក ក្នុងការបង្កើនផលិតកម្មប្រេង និងឧស្ម័នកម្រិតខ្ពស់បំផុតរបស់សហរដ្ឋអាមេរិក។
គួរឲ្យដឹងថា សហរដ្ឋអាមេរិកបានរីកចម្រើនក្លាយជាប្រទេសនាំចេញប្រេងឆៅធំជាងគេបំផុតទី៣ របស់ពិភពលោកបន្ទាប់ពីប្រទេសអារ៉ាប៊ីសាអូឌីត និងរុស្ស៊ី ចាប់តាំងពីខ្លួនបានលុបចោលច្បាប់ហាមឃាត់របស់សហព័ន្ធ លើការនាំចេញប្រេងក្នុងស្រុក នៅក្នុងឆ្នាំ២០១៥ មក។
អ្នកវិភាគប្រចាំក្រុមហ៊ុន Kpler លោក Matt Smith បាននិយាយថា ចិនរួមចំណែកគួរឲ្យកត់សម្គាល់លើការនាំចេញរបស់សហរដ្ឋអាមេរិក ខណៈតម្រូវការអន្តរជាតិសម្រាប់ប្រេងឆៅរបស់អាមេរិក អាចនឹងកើនដល់កម្រិតកំពូលរួចហើយ។ ប៉ុន្តែទោះជាយ៉ាងណាក៏ដោយ ជុំវិញការដាក់ចេញពន្ធសងសឹករបស់ចិន ក្នុងពេលរយ:ពេលចុងក្រោយនេះ អាចធ្វើឲ្យការនាំចេញប្រេងរបស់អាមេរិកធ្លាក់ចុះវិញកាន់តែលឿន។
ទន្ទឹមនឹងនេះ លោក Rohit Rathod អ្នកវិភាគជាន់ខ្ពស់នៃក្រុមហ៊ុន Vortex បាននិយាយផងដែរថា លោករំពឹងថាការនាំចេញប្រេងសរុបរបស់សហរដ្ឋអាមេរិកនឹងធ្លាក់ចុះមកនៅត្រឹម ៣,៦លានបារ៉ែលក្នុងមួយថ្ងៃ ក្នុងឆ្នាំ២០២៥ នេះ ពោលគឺធ្លាក់ចុះពី ៣,៨ លានបារ៉ែលក្នុងមួយថ្ងៃ កាលពីឆ្នាំមុន។
គួរឲ្យដឹងថា ប្រទេសចិនប្រើប្រាស់ប្រេងឆៅរបស់សហរដ្ឋអាមេរិកប្រហែល ១៦៦ ០០០ បារ៉ែលជារៀងរាល់ថ្ងៃ ពោលគឺស្មើទៅនឹងប្រហែល ៥% នៃទំនិញនាំចេញរបស់សហរដ្ឋអាមេរិកទាំងអស់។ ប៉ុន្តែទោះជាយ៉ាងណាផលិតផលអាមេរិកទាំងនោះ អាចនឹងត្រូវចិនផ្លាស់ប្តូរចិត្ត ឬត្រូវបង្វែរទៅរកទីផ្សារផ្សេងទៀត បន្ទាប់ពីទីក្រុងប៉េកាំងបានប្រកាសពន្ធសងសឹកទៅលើរដ្ឋបាលរបស់លោក ត្រាំ វិញក្នុងសប្តាហ៍នេះ។
ជម្រាបជូនផងដែរថា ប្រទេសចិន បានបង្កើនការនាំចូលប្រេងពីប្រទេសកាណាដាយ៉ាងច្រើន រហូតដល់ទៅ ៥ សែនបារ៉ែល កាលពីឆ្នាំមុន ស្របពេលចំណង់ចំណូលចិត្តរបស់ចិនសម្រាប់ប្រេងអាមេរិកក៏បានធ្លាក់ចុះក្នុងប៉ុន្មានឆ្នាំចុងក្រោយនេះ ដោយសាររដ្ឋាភិបាលទីក្រុងប៉េកាំង បានងាកទៅទិញប្រេងបញ្ចុះតម្លៃពីរុស្ស៊ី និងអ៊ីរ៉ង់ ជំនួសវិញផងដែរ៕
