អ្នកស្រុកនៅក្នុងខេត្ត Nakhon Ratchasima ប្រទេសថៃ បាននាំគ្នាសម្រុកទៅលក់មាសរបស់ខ្លួនចេញយ៉ាងច្រើនកកកុញ បន្ទាប់ពីតម្លៃរបស់មាស បានកើនឡើងដល់កម្រិតខ្ពស់បំផុតជាប្រវត្តិសាស្ត្រ។ នេះបើតាមការចុះផ្សាយពីសារព័ត៌មាន The Nation។
លោក សុតថេប ណាក់តាកានកាណុក (Suthep Nattakarnkanok) ទីប្រឹក្សាសមាគមពាណិជ្ជករមាសប្រចាំនៅខេត្ត Nakhon Ratchasima បាននិយាយថា អតិថិជនជាច្រើនបានមកលក់មាសនៅក្នុងហាងមាសរបស់លោក បន្ទាប់ពីតម្លៃរបស់វាបានកើនឡើងខ្លាំង ដោយរំពឹងថាពួកគេនឹងទទួលបានផលចំណេញទៅវិញច្រើន។
លោកបានកត់សម្គាល់ទៀតថា ហាងមាសពី ៦ ទៅ ៧ កន្លែងក្នុងខេត្ត Nakhon Ratchasima ត្រូវបានបង្ខំចិត្តបិទទា្វរ ដោយសារតម្លៃមាសឡើងថ្លៃខ្លាំងពេក ដោយហេតុថាម្ចាស់ហាងទាំងនោះ មានភាពលំបាកក្នុងការស្វែងរកប្រាក់ចំណេញ។ លោកបានបន្ថែមទៀតថា យ៉ាងហោចណាស់ហាងមាសចំនួន ១០ បន្ថែមទៀតអាចនឹងត្រូវបិទ ប្រសិនបើតម្លៃមាសបន្តឡើងថ្លៃថែមទៀតនោះ។
ទោះជាយ៉ាងណាក៏ដោយ លោក Suthep បានចង្អុលបង្ហាញថា ការកើនឡើងនៃតម្លៃមាសនេះក៏បណ្តាលឲ្យមានការធ្លាក់ចុះនៃការទិញមាសត្រលប់ទៅវិញផងដែរ ដោយសារតែមនុស្សធម្មតាមិនអាចមានលទ្ធភាពទិញយកលោហ:ដ៏មានតម្លៃនេះបាន។ លោកបានបន្តថា ពួកគេក៏ភ័យខ្លាចក្នុងការទិញគ្រឿងលម្អមាសផងដែរ ដោយសារតែព្រួយបារម្ភពីសុវត្ថិភាព។
ជម្រាបជូនផងដែរថា តម្លៃទិញដុំមាស បានកើនឡើងដល់ជិត ៤៧ ០០០បាត (១៣៩៦ដុល្លារ) និងមាសសម្រាប់គ្រឿងតុបតែងលម្អបានឡើងដល់ ៤៦ ១០១បាត (១៣៦៩ដុល្លារ) ចំពេលមានការគំរាមកំហែងពន្ធថ្មីរបស់សហរដ្ឋអាមេរិក បានពង្រីកសង្គ្រាមពាណិជ្ជកម្ម និងការព្រួយបារម្ភអំពីអតិផរណាកាន់តែខ្លាំង៕
