អនុគម្រោងសាងសង់បណ្តាញលូ និងស្ថានីយបូមទឹកភ្លៀងក្រុងក្រចេះ នៃគម្រោងអភិវឌ្ឍន៍ក្រុងរបៀង៤ បានចាប់ផ្តើមបើកការដ្ឋានសាងសង់ នៅថ្ងៃទី៥ ខែមីនានេះ ដោយគម្រោងនេះជាគម្រោងក្រោមជំនួយពីADB ដែលចំណាយថវិកាប្រមាណជា៧លានដុល្លារ។នេះបើតាមការឱ្យដឹងពីរដ្ឋបាលខេត្តក្រចេះ នៅថ្ងៃទី៥ ខែមីនា ឆ្នាំ២០២៥។
ពិធីបើកការដ្ឋានសាងសង់បណ្តាញលូ និងស្ថានីយបូមទឹកភ្លៀងក្រុងក្រចេះ នៃគម្រោងអភិវឌ្ឍន៍ក្រុងរបៀង៤ បានធ្វើឡើងក្រោមអធិបតី ហេង សុថា អភិបាលរងខេត្តក្រចេះ និងលោក ពូ ម៉ានិត អគ្គនាយករង តំណាងលោកអនុរដ្ឋលេខាធិការ និងជាប្រធានគម្រោង នៃក្រសួងសាធារណការ និងដឹកជញ្ជូន ព្រមទាំងមានការចូលរួមពីតំណាងទីប្រឹក្សាបច្ចេកទេសរបស់ ADB ផងដែរ កាលពីថ្ងៃទី៥ ខែមីនា ឆ្នាំ២០២៥។
លោក ពូ ម៉ានិត បានឱ្យដឹងថា គោលបំណងនៃការការសាងសង់ប្រព័ន្ធរំដោះទឹកភ្លៀងក្នុងក្រចេះ គឺដើម្បីរំដោះទឹកភ្លៀងពីក្រុង ការពារការជន់លិច ក្នុងរដូវវស្សា ហើយប្រព័ន្ធនេះជួយបញ្ជៀសការលិចលង់ក្នុងក្រុង លើកកម្ពស់អនាម័យសុខភាព និងជីវភាពប្រជាជន ក៏ដូចជាជួយជំរុញសេដ្ឋកិច្ចក្នុងក្រុងទាំងមូល ។
លោកបន្តថា ការងារសាងសង់បណ្ដាញលូ និងស្ថានីយបូមទឹកភ្លៀងនេះ គឺ១)-ការសាងសង់អគារស្ថានីយបូមមួយកន្លែង មានទំហំ ១៦.៧ម៉ែត្រx៣០ម៉ែត្រ ២)-មានសំណង់ម៉ាត់ឈ្នាងបង្ហូរទឹកចេញពីស្ថានីយទំហំ១៣.៤ម៉ែត្រx១៨.៥ម៉ែត្រ ៣)-មានបំពាក់ម៉ាស៊ីនបូមទឹកចំនួន៣ម៉ាស៊ីន មានសមត្ថភាពបូមទឹកបាន ១០៣៨០ ម៉ែត្រគូបក្នុងមួយម៉ោង ៤)-ផ្លូវបេតុងចូលស្ថានីយប្រវែង១១០ម៉ែត្រ ទទឹងផ្លូវ៧.៥ម៉ែត្រ ៥)-សាងសង់នូវបណ្ដាញលូបេតុងប្រអប់មេ ប្រវែង១១២៣ម៉ែត្រ ៦)-សាងសង់បណ្ដាញលូប្រមូលទឹក តភ្ជាប់ជាមួយបណ្ដាញលូចាស់ប្រវែង ៤៩៦ម៉ែត្រ ៧)-សាងសង់ប្រឡាយទឹករៀបថ្ម ទំហំទទឹងបាត្រប្រឡាយ១.៥ម៉ែត្រ ជម្រៅ៣ម៉ែត្រ ប្រវែង២២០ម៉ែត្រ ។
លោក ហេង សុថា អភិបាលរងខេត្តក្រចេះ បានគូសបញ្ជាក់ផងដែរថា ដោយមានជំនួយគាំទ្រពីធនាគារអភិវឌ្ឍន៍អាស៊ី (ADB) និងក្រុមការងារបច្ចេកទេស នៃក្រសួងសាធារណការ និងដឹកជញ្ជូន ខេត្តក្រចេះទទួលបានទីលានទុកដាក់សំរាមក្រុងក្រចេះ ដែលបានសាងសង់រួចរាល់, គម្រោងសាងសង់ប្រព័ន្ធលូរំដោះទឹកភ្លៀងក្រុងក្រចេះដែលកំពុងបើកការដ្ឋានសាងសង់, និងគម្រោងរៀបចំកែលម្អឡើងវិញនូវរង្វង់មូលព្រាបស ,អនុគម្រោងដាក់បង់អង្គុយ និងអំពូលភ្លើងប្រើពន្លឺសូឡាតាមមាត់ទន្លេ, គម្រោងរៀបចំកែលម្អឡើងវិញនូវរង្វង់មូលនាគបាញ់ទឹក និងរៀបចំទីកន្លែងសម្រាប់ហាត់ប្រាណ និងកន្លែងសម្រាប់ក្មេងលេងជាដើម ៕
