លោកស្រី អ៊ូ ធីតាពៅ ភរិយារបស់ ឯកឧត្តម គួច ចំរើន អភិបាលនៃគណៈអភិបាលខេត្តកណ្តាល បានសម្រេចចិត្តសាងផ្នួសកាន់សីល១០ នៅប្រទេសឥណ្ឌា រយៈពេល ១៥ថ្ងៃ ពោរពេញទៅដោយកុសល ដើម្បីសម្រេចតាមបំណងប៉ងប្រាថ្នារបស់ខ្លួន។
តាមការបង្ហាញឱ្យដឹងលើបណ្តាញសង្គមហ្វេសប៊ុក នៅរសៀលថ្ងៃទី១៣ ខែមីនា ឆ្នាំ២០២៥នេះ លោកស្រី អ៊ូ ធីតាពៅ បានសរសេរយ៉ាងដូច្នេះថា៖ «ម៉ិចហើយជីវិត! អរគុណគ្រួសារសាច់ញាតិមិត្តភ័ក្ត្របងប្អូនដែលជួយសម្របសម្រួលអោយបំណងប្រាថ្នារបស់ខ្ញុំបានសម្រេច! ជីវិតដូនជីរក្សាសិល១០ រយៈពេល១៥ថ្ងៃ នៅប្រទសឥណ្ឌា ពោរពេញទៅដោយកុសល។ ចង់អោយអ្នកទាំងឡាយបានភ្លក់រស់ជាតិ តែអាស្រ័យលើបុណ្យចាស់របស់សត្វ”។
លោកស្រីបានបន្ថែមថា ដូចនេះមានតែជូនបុណ្យ សូមបុណ្យដែលលោកស្រីបានកសាងសព្វៗកាល បានដល់អ្នកទាំងឡាយទាំងពួងទាំងអស់ ទាំងអរុកអារក្សអ្នកតា ទេវតាឥន្ទ្រព្រហ្មសព្វសត្វទាំង១០ ទិស៣១ឋាន បានទទួលចំណែកបុណ្យរបស់លោកស្រី។ សូមអោយសព្វសត្វបានសេចក្តីសុខរួចចាកផុតទុក្ខបានរួចរំដោះ។ សុំអនុមោទនាបុណ្យតាមសមគួរដោយសទ្ធាជ្រះថ្លាទទួលបុណ្យផងចុះ។
សូមជម្រាបថា ជារឿយៗលោកស្រី អ៊ូ ធីតាពៅ ភរិយាឯកឧត្តមអភិបាលខេត្តកណ្តាល តែងតែចូលរួមលើកស្ទួយពុទ្ធសាសនា និងចូលរួមចំណែកក្នុងកិច្ចការងារសិក្សាព្រះធម៌ជាហូរហែរ អាចទុកថា ជាពុទ្ធសាសនូបត្ថម្ភដ៏ឆ្នើមក្នុងព្រះសាសនាផងដែរ៕
