អ្នកជំនាញ នៃក្រសួងបរិស្ថាន និងក្រសួងសាធារណការ និងដឹកជញ្ជូន បានបើកកិច្ចប្រជុំជាមួយភាគីពាក់ព័ន្ធ ដើម្បីវាយតម្លៃហេតុប៉ះពាល់បរិស្ថានពេញលេញ សម្រាប់គម្រោងធ្វើឱ្យប្រសើរឡើងវិញផ្លូវជាតិលេខ៦៨ ដែលភ្ជាប់ពីក្រឡាញ់សំរោង និងអូរស្មាច់។ នេះបើយោងតាមហ្វេសប៊ុកក្រសួងសារធាណការ និងដឹកជញ្ជូន កាលថ្ងៃទី ១៣ ខែមិនា ឆ្នាំ២០២៥។
ក្រសួងសាធារណការ និងដឹកជញ្ជូន បានឱ្យដឹងថា កិច្ចប្រជុំរបស់ក្រុមអ្នកជំនាញ បានធ្វើឡើង កាលពីថ្ងៃទី១៣ ខែមីនា ឆ្នាំ២០២៥ ដោយភាគីពាក់បានធ្វើការពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថានពេញលេញ សម្រាប់គម្រោងធ្វើឱ្យប្រសើរឡើងវិញផ្លូវជាតិលេខ៦៨ (ក្រឡាញ់-សំរោង-អូរស្មាច់) ប្រវែង ១២០គីឡូម៉ែត្រ ដែលមានទីតាំងស្ថិតនៅក្នុងភូមិសាស្ត្រខេត្តសៀមរាប និងខេត្តឧត្តរមានជ័យ។
ជាលទ្ធផល អង្គប្រជុំខាងលើ ក៏បានវាយតម្លៃខ្ពស់ទៅលើរបាយការណ៍វាយតម្លៃហេតុប៉ះពាល់បរិស្ថាននៃគម្រោងធ្វើឱ្យប្រសើរឡើងវិញផ្លូវជាតិលេខ ៦៨ ដែលបានគិតគូរគ្រប់ជ្រុងជ្រោយ ទាំងបច្ចេកទេស គុណភាព សេដ្ឋកិច្ច សង្គម និងបរិស្ថាន។នេះបើយោងតាមការបញ្ជាក់បន្ថែមពីក្រសួងសាធារណការ និងដឹកជញ្ជូន៕
