មហាសេដ្ឋីមានដាច់គេរបស់ពិភពលោក Elon Musk បាននិយាយថា គោលដៅរបស់ទីភ្នាក់ងារប្រសិទ្ធភាពរដ្ឋាភិបាលសហរដ្ឋអាមេរិក (DOGE) ក្នុងការជួយកាត់បន្ថយថវិកាសហព័ន្ធចំនួន ១ទ្រីលានដុល្លារ គឺអាចសម្រេចបានដោយនឹងមិនប៉ះពាល់ដល់សេវាកម្មសំខាន់ៗនោះឡើយ។ នេះបើតាមការចុះផ្សាយពីសារព័ត៌មាន Fox News។
ក្នុងបទសម្ភាសមួយកាលពីថ្ងៃទី២៧ ខែមីនាកន្លងទៅ លោក Musk បាននិយាយថា គោលដៅរបស់ក្រុមប្រឹក្សា DOGE គឺដើម្បីកាត់បន្ថយឱនភាពឲ្យបានចំនួន ១ទ្រីលានដុល្លារ ពោលគឺកាត់បន្ថយការចំណាយថវិការបស់សហព័ន្ធពីចំនួន ៧ទ្រីលានដុល្លារពីមុន មកនៅត្រឹម ៦ទ្រីលានដុល្លារ ក្នុងពេលបច្ចុប្បន្ន។
ទន្ទឹមនឹងនេះ លោក Musk បាននិយាយទៀតថា ៖” ការកាត់បន្ថយថវិកា ១៥% ដោយការលុបបំបាត់កាកសំណល់ និងការក្លែងបន្លំ គឺពិតជាអាចធ្វើទៅបាន។ រដ្ឋាភិបាលគ្មានប្រសិទ្ធភាព ហើយមានការខ្ជះខ្ជាយ និងការក្លែងបន្លំច្រើន។ ដូច្នេះយើងជឿជាក់ថា យើងអាចកាត់បន្ថយថវិកាបាន ១៥% ដោយមិនប៉ះពាល់ដល់សេវាសំខាន់ៗរបស់រដ្ឋាភិបាលនោះឡើយ”។
គួរឲ្យដឹងថា គិតត្រឹមថ្ងៃទី២៧ ខែមីនា ទីភ្នាក់ងារ DOGE អះអាងថាបានជួយសន្សំសំចៃដល់រដ្ឋាភិបាលសហរដ្ឋអាមេរិកបានចំនួន ១៣០ពាន់លានដុល្លាររួចមកហើយ។ ហើយជាមួយគ្នានោះ ដើម្បីដោះស្រាយការរិះគន់ចំពោះវិធានការដ៏ធ្ងន់ធ្ងរនេះ មហាសេដ្ឋីរូបនេះ បានអះអាងថា DOGE តែងតែ “ប្រុងប្រយ័ត្ន” ជានិច្ច អំពីអ្វីដែលខ្លួនបានកាត់បន្ថយ។
ជម្រាបជូនថា បន្ទាប់ពីចូលកាន់តំណែងនៅថ្ងៃទី២០ ខែមករា ប្រធានាធិបតីអាមេរិក លោក ដូណាល់ ត្រាំ បានចុះហត្ថលេខាលើបទបញ្ជាប្រតិបត្តិមួយដោយបង្កើតទីភ្នាក់ងារ DOGE ដើម្បីអនុវត្តផែនការដើម្បីសម្រួល និងកែទម្រង់រដ្ឋាភិបាលសហព័ន្ធ។ លោក ត្រាំ បាននិយាយថា លោកបានតែងតាំងមហាសេដ្ឋី Musk ឲ្យទទួលបន្ទុកដឹកនាំនៅក្នុងទីភ្នាក់ងារនេះ។
លោក Musk បានជួយសម្រួលដល់ការកាត់បន្ថយការចំណាយរបស់ទីភ្នាក់ងារសហព័ន្ធ ចាប់តាំងពីចុងខែមករាមក ដោយជំរុញឲ្យមានការបញ្ឈប់ការងារ និងកាត់បន្ថយថវិការបស់ទីភ្នាក់ងារយ៉ាងច្រើន រួមទាំងការបិទទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) និងការិយាល័យការពារហិរញ្ញវត្ថុអ្នកប្រើប្រាស់ ថែមទៀតផង៕
