ក្រុមហ៊ុន Regional Fish Institute, Ltd. មកពីប្រទេសជប៉ុន បានមកជួបពិភាក្សាជមួយក្រុមប្រឹក្សាអភិវឌ្ឍន៍កម្ពុជា ដើម្បីចង់ផ្សព្វផ្សាយ និងផ្តល់ព័ត៌មានពីវារីវប្បកម្មតាមបែបវិទ្យាសាស្រ្តទំនើបដល់កម្ពុជា សំដៅឈានទៅបោះទុនវិនិយោគនាពេលខាងមុខ។
ការលើកឡើងនេះ ត្រូវបានធ្វើឡើងនៅក្នុងជំនួបពិភាក្សារវាងលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ជាមួយប្រតិភូក្រុមហ៊ុន Regional Fish Institute, Ltd. មកពីប្រទេសជប៉ុន។
ជំនួបនេះធ្វើឡើង ដើម្បីបង្ហាញពីបេសកកម្មនិងចក្ខុវិស័យ, ជំនាញឯកទេសនិងប្រវត្តិប្រតិបត្តិការ របស់ក្រុមហ៊ុន ដើម្បីទទួលបានការចង្អុលបង្ហាញ នឹងអាចឈានទៅរកការពិនិត្យលទ្ធភាពនិងឱកាស ក្នុងការបង្កើតកិច្ចសហប្រត្តិបត្តិការណាមួយជាមួយស្ថាប័នពាក់ព័ន្ធនាពេលអនាគត។
ក្រុមហ៊ុន Regional Fish Institute, Ltd. មានជំនាញឯកទេសលើកិច្ចការវារីវប្បកម្ម(Aquaculture) ដោយប្រើប្រាស់បច្ចេកវិទ្យាជីវសាស្រ្តជាន់ខ្ពស់ (Bio-Technology) ដើម្បីលើកកម្ពស់ផលិតភាព, ការស្រាវជ្រាវនិងច្នៃបង្កើតពូជថ្មីៗ, ព្រមទាំងការបង្កើនស្តង់ដារគុណភាពជលផលដែលផលិតបាន ដើម្បីបំពេញតម្រូវការទីផ្សារនាំចេញ។ បន្ថែមពីនេះ ក្រុមហ៊ុនក៏មានគោលដៅក្នុងការសិក្សាស្រាវជ្រាវ, ការផ្ទេរបច្ចេកវិទ្យា និងការផ្សព្វផ្សាយព័ត៌មានអំពីកិច្ចការវារីវប្បកម្មតាមបែបវិទ្យាសាស្រ្តទំនើប ដោយផ្តោតលើទិដ្ឋភាពផ្សេងៗគ្នានៅក្នុងតំបន់ដើម្បីជំរុញនិរន្តរភាពលើវិស័យមួយនេះ។
ជាការឆ្លើយតប លោក ស៊ុន ចាន់ថុល បានជូនជាគំនិតក្នុងការសិក្សាស្រាវជ្រាវ ស្វែងយល់បន្ថែមអំពីទិដ្ឋភាពទូទៅនៃកិច្ចការវារីវប្បកម្មតាមបច្ចេកវិទ្យាជីវសាស្រ្តជាន់ខ្ពស់នេះ ជាមួយនឹងស្ថាប័នជំនាញពាក់ព័ន្ធ ពិសេសគឺក្រសួងកសិកម្ម រុក្ខាប្រមាញ់ និងនេសាទ ដើម្បីឱ្យសមស្របតាមបទដ្ឋានពាក់ព័ន្ធនានា និងបង្ការការពារផលប៉ះពាល់ណាមួយដល់ប្រព័ន្ធជីវៈចម្រុះរបស់កម្ពុជាដែលមានស្រាប់៕ អត្ថបទ៖ហ្សាលីន
