(រាជធានីភ្នំពេញ)៖ នាថ្ងៃពុធ ទី ២៩ ខែមីនា ឆ្នាំ ២០២៥ កន្លងទៅ ផ្សារទំនើប ជីប ម៉ុង ២៧១ មេហ្គា ម៉ល បានសហការជាមួយ នាយកដ្ឋានសិល្បៈទស្សនីយភាពនៃក្រសួងវប្បធម៌និងវិចិត្រសិល្បៈ នាំយកសិល្បៈល្ខោនដែលសឹងតែបាត់មុខគឺ ល្ខោនបាមោជ្ជទ័យរឿង “កុលាបប៉ៃលិន” មកសម្តែងជាលើកទីពីរ សម្រាប់ទស្សនិកជនទស្សនាដោយសេរី បន្ទាប់ពីទទួលបានជោគជ័យលើការសម្តែងលើកទី១ ដោយទទួលបានការគាំទ្រដ៏ច្រើនលើសលុបពីសំណាក់មហាជន។
នារាត្រីដ៏ពិសេសនោះ ក៏មានវត្តមានដ៏ខ្ពង់ខ្ពស់ពីលោកជំទាវ ឡងឌី សាន់ណារ៉ា រដ្ឋលេខាធិការ ក្រសួងវប្បធម៌ និងវិចិត្រសិល្បៈ លោកអ្នកឧកញ៉ា ភាព ហៀក ស្ថាបនិកក្រុមហ៊ុន ជីប ម៉ុង លោកជំទាវ តែ សុវណ្ណនី អគ្គនាយិកាពហុពាណិជ្ជកម្ម ក្រុមហ៊ុន ជីប ម៉ុង និង លោកជំទាវ លី សុខឆេង អគ្គនាយិកាក្រុមហ៊ុន ជីប ម៉ុង រីថែល បានចូលរួមទស្សនាផងដែរ។ លើសពីនេះទៀត លោកអ្នកឧកញ៉ា ភាព ហៀក បានធ្វើការឧបត្ថម្ភថវិកា ១០ លានរៀល បន្ថែមទៀតជូនទៅសិល្បករ សិល្បការិនី នៃនាយកដ្ឋានសិល្បៈទស្សនីយភាព របស់ក្រសួងវប្បធម៌ និងវិចិត្រសិល្បៈ ដើម្បីជាការលើកទឹកចិត្តផងដែរ។ មិនតែប៉ុណ្ណោះ នាឱកាសចូលឆ្នាំថ្មីប្រពៃណីខ្មែរខាងមុខនេះ ផ្សារទំនើប ជីប ម៉ុង ២៧១ មេហ្គា ម៉ល នឹងនាំយកនូវសិល្បៈទស្សនីយភាពបុរាណជាច្រើនទម្រង់ផ្សេងទៀតដូចជា ល្ខោនខោល ល្ខោនអាប៉េ របាំប្រពៃណី និង របាំបុរាណ ជូនពុកម៉ែ បងប្អូនទស្សនាកម្សាន្តដោយសេរីបន្ថែមទៀត។
គួរបញ្ជាក់ផងដែរថា ក្រុមហ៊ុន ជីប ម៉ុង រីថែល ឯ.ក បានចុះអនុស្សរណៈនៃការយោគយល់គ្នាជាមួយ ក្រសួងវប្បធម៌ និងវិចិត្រសិល្បៈ កាលពីខែធ្នូ ឆ្នាំ ២០២៤ ស្តីពីកិច្ចសហការលើវិស័យវប្បធម៌ និងសិល្បៈ ឧបត្ថម្ភទឹកប្រាក់រហូតដល់ ២៥ ម៉ឺនដុល្លារ ក្នុងគោលបំណងលើកស្ទួយវប្បធម៌ និងសិល្បៈ ដែលជាកេរតំណែលដូនតា ឱ្យកាន់តែកៀក និងទូលំទូលាយដល់ប្រជាពលរដ្ឋកម្ពុជាក្នុងរយៈពេល ៥ ឆ្នាំ រាប់ពីឆ្នាំ ២០២៥-២០៣០។
នេះគឺជាឆន្ទៈដ៏មុះមុតមួយរបស់ ផ្សារទំនើបខ្នាតអន្តរជាតិរបស់កូនខ្មែរ ជីប ម៉ុង រីថែល អោយក្លាយជាគោលដៅផ្សព្វផ្សាយសិល្បៈ និងវប្បធម៌ខ្មែរ ដោយបានរៀបចំព្រឹត្តិការណ៍វប្បធម៌ និងទស្សនីយភាពការសម្តែងសិល្បៈគ្រប់ទម្រង់ ជួយអភិរក្ស អភិវឌ្ឍ ព្រមទាំងពង្រីកចំណេះដឹង និងផ្សព្វផ្សាយអត្តសញ្ញាណជាតិទៅកាន់សង្គមជាតិ តាមរយៈសកម្មភាពសិល្បៈ ព្រឹត្តិការណ៍ និងមហោស្រពជាច្រើនទៀត នាពេលអនាគតរបស់ក្រុមហ៊ុន ជីប ម៉ុង រីថែល។
ក្រុមហ៊ុន ជីប ម៉ុង រីថែល បានប្តេជ្ញាចិត្តបន្តចូលរួមយ៉ាងពេញទំហឹងក្នុងការលើកស្ទួយ អភិរក្ស និងអភិវឌ្ឍសិល្បៈ និងវប្បធម៌ខ្មែរឱ្យកាន់តែទូលំទូលាយ ហើយការផ្សព្វផ្សាយនេះ ធ្វើទៅបានជោគជ័យត្រូវការចូលរួមគាំទ្រពីប្រជាពលរដ្ឋគ្រប់រូបផងដែរ។
ព័ត៌មានបន្ថែម លោកអ្នកអាចតាមដានផេកផ្លូវការរបស់ផ្សារទំនើប ជីប ម៉ុង ២៧១ មេហ្គា ម៉ល ឬទំនាក់ទំនងទៅកាន់លេខទូរស័ព្ទ៖ 087 711 811 & 090 711 811។ សម្រាប់ទំនាក់ទំនងជួលទីតាំងលក់៖ 090 558 822 & 067 222 784។
