យោងតាមរបាការណ៍របស់រដ្ឋាភិបាលបានបង្ហាញឲ្យដឹងកាលពីថ្ងៃចន្ទថា សេដ្ឋកិច្ចរបស់ប្រទេសជប៉ុន អាចនឹងទទួលរងការខាតបង់ជាទឹកប្រាក់ដល់ទៅ ១,៨១ទ្រីលានដុល្លារ ដោយសារតែគ្រោះរញ្ជួយដីកម្រិតដ៏ខ្លាំងក្លាមួយដែលរំពឹងថាទុកថាអាចកើតមានជាយូរមកហើយ នៅតំបន់ឆ្នេរសមុទ្រប៉ាស៊ីហ្វិក ហើយវានឹងបណ្តាលឲ្យកើតមានរលកយក្សស៊ូណាមិ ការដួលរលំអគាររាប់រយ និងអាចសម្លាប់មុស្សប្រហែល ៣០០០ ០០០ នាក់ ថែមទៀតផង។ នេះបើតាមការចុះផ្សាយពីសារព័ត៌មាន Reuters។
ជប៉ុន ត្រូវបានចាត់ទុកថាប្រទេសមួយក្នុងចំណោមប្រទេសដែលងាយរងគ្រោះទៅនឹងគ្រោះរញ្ជួយដីខ្លាំងបំផុតរបស់ពិភពលោក ហើយរដ្ឋាភិបាល បានមើលឃើញថាវាមានឱកាសប្រហែល ៨០% នៃការកើតមានគ្រោះរញ្ជួយដីកម្រិតពី ៨ ទៅ ៩ រ៉ិចទ័រ នៅតាមតំបន់បាតសមុទ្រ ដែលគេស្គាល់ថាជាតំបន់ Nankai Trough ។
ហើយយ៉ាងណាមិញ បើសិនបើគ្រោះធម្មជាតិដ៏កាចសាហាវនេះ កើតឡើងពិតមែននោះ របាយការណ៍របស់គណៈរដ្ឋមន្ត្រីបានបង្ហាញឲ្យដឹងទៀតថា ការខូចខាតសេដ្ឋកិច្ចដែលរំពឹងទុកអាចនឹងមានចំនួនសរុបប្រមាណ ២៧០,៣ទ្រីលានយ៉េន (១,៨១ទ្រីលានដុល្លារ) ឬស្មើនឹងជិតពាក់កណ្តាលនៃផលិតផលក្នុងស្រុកសរុបរបស់ប្រទេសជប៉ុន។
ដោយផ្អែកលើគ្រោះរញ្ជួយដីកម្រិត ៩ រ៉ិចទ័រ នៅក្នុងតំបន់នោះ ប្រទេសជប៉ុន នឹងត្រូវជម្លៀសមនុស្សចំនួន១,២៣ លាននាក់ ឬស្មើនឹង ១០% នៃចំនួនប្រជាជនសរុបរបស់ខ្លួន។ ហើយរបាយការណ៍ដដែលនេះ ក៏បានបង្ហាញទៀតថា មនុស្សរហូតដល់ ២៩៨ ០០០ នាក់ អាចបាត់បង់ជីវិត ដោយសាររលកយក្សស៊ូណាមិ និងការដួលរលំបាក់អគារ។
កាលពីឆ្នាំមុន ប្រទេសជប៉ុន ក៏បានចេញសេចក្តីណែនាំអំពីគ្រោះរញ្ជួយដីកម្រិតខ្លាំងជាលើកដំបូង ដែលអាចមានកម្រិតដល់ ៩ រ៉ិចទ័រ បន្ទាប់ពីគ្រោះរញ្ជួយដីកម្រិត ៧,១ រ៉ិចទ័រ បានកើតឡើងនៅគែមនៃរណ្ដៅបាតសមុទ្រ។
ជម្រាបជូនផងដែរថា គ្រោះរញ្ជួយដីកម្រិត ៩ រ៉ិចទ័រ លើកចុងក្រោយបំផុត ក្នុងឆ្នាំ២០១១ ដែលបានបង្កឲ្យមានរលកយក្សស៊ូណាមិ និងបានបំផ្លាញដល់រោងចក្រថាមពលនុយក្លេអ៊ែរ នៅភាគឦសានប្រទេសជប៉ុន បានសម្លាប់មនុស្សអស់ប្រមាណជាង ១៥ ០០០ នាក់៕
