រដ្ឋាភិបាលរបស់ប្រទេសចិន នៅថ្ងៃព្រហស្បតិ៍នេះ បានទទូចឲ្យសហរដ្ឋអាមេរិកលុបចោលជាបន្ទាន់នូវផែនការពន្ធគយចុងក្រោយបំផុតរបស់ខ្លួន ហើយថែមទាំងបានបេ្តជ្ញាថានឹងចាត់វិធានការណ៍ឆ្លើយតបយ៉ាងម៉ឺងម៉ាត់ជាទីបំផុត ដើម្បីការពារផលប្រយោជន៍របស់ខ្លួន។ នេះបើតាមការចុះផ្សាយពីសារព័ត៌មាន Reuters។
យ៉ាងណាមិញ ជុំវិញការប្រកាសនេះ ត្រូវបានធ្វើឡើង បន្ទាប់ពីប្រធានាធិបតីលោក ត្រាំ កាលពីថ្ងៃពុធ បានប្រកាសថាប្រទេសចិន នឹងរងការវាយប្រហារដោយផែនការពន្ធគយ ៣៤% បន្ថែមទៀត ពីលើពន្ធដែលមានស្រាប់ ២០% ដែលសហរដ្ឋអាមេរិក បានដាក់កាលពីដើមឆ្នាំនេះ និងនាំឲ្យពន្ធគយថ្មីសរុបកើនឡើងដល់ទៅ ៥៤%។
យ៉ាងណាមិញ ក្រសួងពាណិជ្ជកម្មចិន បាននិយាយនៅក្នុងសេចក្តីថ្លែងការណ៍មួយថា ចំណាត់ការរបស់សហរដ្ឋអាមេរិក ហាក់ដូចជាមិនយកចិត្តទុកដាក់ទាល់តែសោះទៅលើតុល្យភាពនៃផលប្រយោជន៍ដែលទទួលបាននៅក្នុងការចរចាពាណិជ្ជកម្មពហុភាគី ក្នុងរយៈពេលប៉ុន្មានឆ្នាំមកនេះ និងការពិតដែលថា សហរដ្ឋអាមេរិក តែងទទួលបានអត្ថប្រយោជន៍យ៉ាងច្រើនពីពាណិជ្ជកម្មអន្តរជាតិជាយូរមកហើយនោះ។
ក្រសួងបាននិយាយទៀតថា៖ “ប្រទេសចិន នឹងប្រឆាំងយ៉ាងម៉ឺងម៉ាត់ចំពោះរឿងនេះ ហើយនឹងចាត់វិធានការណ៍តបតដើម្បីការពារសិទ្ធិ និងផលប្រយោជន៍ផ្ទាល់ខ្លួន”។
ជម្រាបជូនផងដែរថា ក្រុមហ៊ុននាំចេញរបស់ចិន ក៏ដូចជាក្រុមហ៊ុនមកពីគ្រប់ប្រទេសផ្សេងទៀត នឹងត្រូវប្រឈមមុខទៅនឹងពន្ធលើមូលដ្ឋាន ១០% ដោយនឹងត្រូវចូលជាធរមាន ចាប់ពីថ្ងៃសៅរ៍ខាងមុខនេះតទៅ មុនពេលវិធានការពន្ធគយពិសេសខ្ពស់ជាងនេះ ដែលដាក់ទៅលើដៃគូពាណិជ្ជកម្មសំខាន់ៗ នឹងត្រូវចូលជាធរមានចាប់ពីថ្ងៃទី៩ ខែមេសា៕
