វេទិកានិងពិព័រណ៍កសិកម្មកម្ពុជា ហៅកាត់ថា CAFE25 នឹងធ្វើឡើងនៅថ្ងៃទី៧-៨ ខែមេសា ឆ្នាំ២០២៥ខាងមុខនេះ ក្រោមអធិបតីលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅសណ្ឋាគារសាងគ្រីឡាភ្នំពេញ។ វេទិកានិងពិព័រណ៍កសិកម្មកម្ពុជានេះ នឹងប្រមូលនិងកៀរគរវិនិយោគិនបរទេស មកដាក់ទុនវិនិយោគលើវិស័យកសិកម្មនៅកម្ពុជា។
ក្រសួងកសិកម្ម បានឱ្យដឹងថា វេទិកានិងពិព័រណ៍កសិកម្មកម្ពុជា នឹងមានភ្ញៀវកិត្តិយសចូលរួមប្រមាណ៥០០នាក់ រួមមាន មន្ត្រីរាជរដ្ឋាភិបាល អ្នកតាក់តែងគោលនយោបាយ និងតំណាងមកពីវិស័យឯកជន សមាគមធុរកិច្ច វិនិយោគិន ស្ថាប័នហិរញ្ញវត្ថុ ស្ថានទូត អង្គការពាណិជ្ជកម្ម ដៃគូអភិវឌ្ឍន៍ អង្គការមិនមែនរដ្ឋាភិបាល សហគមន៍កសិកម្ម ស្ថាប័នស្រាវជ្រាវ និងផ្នែកសិក្សាធិការនានា។
នៅក្នុងរយៈពេល ២ថ្ងៃ តួអង្គសំខាន់ៗមកពីចម្រុះមជ្ឈដ្ឋាន នឹងជជែកពិភាក្សាគ្នាដើម្បីឈានទៅកំណត់អំពីតម្រូវការវិនិយោគជាក់លាក់សម្រាប់ប្រភេទមុខទំនិញកសិផលចំនួន៩ប្រភេទ ជាអាថិ៍ ស្រូវអង្ករ ស្វាយចន្ទី កៅស៊ូ ដំឡូងមី ស្វាយ វារីវប្បកម្ម ម្រេច និងផលិតផលឈើជាដើម ដើម្បីរៀបចំផែនការ យុទ្ធសាស្ត្រសម្រាប់ការអនុវត្តបន្ត។
សូមជម្រាបថា នេះគឺជាប្រវត្តិសាស្ត្រដំបូងបង្អស់របស់កម្ពុជា ដែលក្រសួងកសិកម្ម រុក្ខាប្រមាញ់ និងនេសាទ ផ្ដួចផ្ដើមរៀបចំវេទិកានិងពិព័រណ៍កសិកម្មកម្ពុជា ដើម្បីប្រមូលនិងកៀរគរវិនិយោគិនបរទេស មកដាក់ទុនវិនិយោគលើវិស័យកសិកម្មនៅកម្ពុជា៕
