ភាគហ៊ុនរបស់ក្រុមហ៊ុនបច្ចេកវិទ្យាខ្នាតយក្សអាមេរិក Apple បានធ្លាក់ចុះអស់ច្រើនជាង ៦% នៅក្នុងការជួញដូរចុងក្រោយមួយ កាលពីថ្ងៃពុធ ពោលគឺជាតួលេខធ្លាក់ចុះនាំមុខគេ បើធៀបទៅនឹងក្រុមហ៊ុនបច្ចេកវិទ្យាធំៗផ្សេងទៀត បន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្រកាសចេញពន្ធគយថ្មីមានអត្រាចន្លោះពី ១០% ទៅ ៤៩% លើទំនិញនាំចូល។ នេះបើតាមការចុះផ្សាយពីសារព័ត៌មាន CNBC។
ប្រភពដដែលនេះ បានបង្ហាញឲ្យដឹងទៀតថា ប្រាក់ចំណូលភាគច្រើនរបស់ក្រុមហ៊ុន Apple គឺបានមកពីឧបករណ៍ដែលផលិតជាចម្បងនៅក្នុងប្រទេសចិន និងប្រទេសក្នុងតំបន់អាស៊ីមួយចំនួនទៀត ដែលជាហេតុធ្វើឲ្យក្រុមវិនិយោគិន កាន់តែមានការព្រួយបារម្ភបន្ថែមទៀត ពាក់ព័ន្ធទៅនឹងវិធានការពន្ធគយថ្មីរបស់លោក ត្រាំ នេះ។
ទន្ទឹមនឹងនេះ ក្រុមហ៊ុន Nvidia ដែលត្រូវបានគេដឹងថាកំពុងផលិតបន្ទះឈីបនៅតៃវ៉ាន់ និងដំឡើងប្រព័ន្ធបញ្ញាសិប្បនិម្មិតរបស់ខ្លួននៅម៉ិកស៊ិក និងប្រទេសផ្សេងទៀត ក៏បានមើលឃើញភាគហ៊ុនរបស់ខ្លួន បានធ្លាក់ចុះអស់ប្រហែល ៤% ផងដែរ ស្របពេលក្រុមហ៊ុនផលិតរថយន្តអគ្គិសនី Tesla បានធ្លាក់ចុះអស់ ៤,៥% ។
យ៉ាងណាមិញ នៅក្នុងចំណោមក្នុងក្រុមហ៊ុនបច្ចេកវិទ្យាកំពូលៗផ្សេងទៀត រួមមាន Alphabet , Amazon និង Meta ជាដើមនោះ បានធ្លាក់ចុះភាគហ៊ុនរបស់ខ្លួនចន្លោះពី ២,៥% ទៅ ៥% ស្របពេលក្រុមហ៊ុន Microsoft ធ្លាក់ចុះជិត ២%។
ជម្រាបជូនផងដែរថា ប្រធានាធិបតីលោក ត្រាំ កាលពីថ្ងៃពុធកន្លងទៅ បានប្រកាសដាក់ចេញវិធានការពន្ធគយថ្មីទ្រង់ទ្រាយធំបន្ថែមទៀត ស្របពេលលោក ក៏បានិយាយថា វានឹងក្លាយជាសេចក្តីប្រកាសឯករាជ្យភាពនៃសេដ្ឋកិច្ចសម្រាប់អាមេរិក។ ហើយជាមួយគ្នានេះ លោក ត្រាំ ក៏បានប្រកាសផងដែរថា ពន្ធគយ ១០% ជាមូលដ្ឋាន សម្រាប់ទំនិញនាំចូលទាំងអស់ នឹងកំណត់ឲ្យចូលជាធរមាននៅថ្ងៃទី៥ ខែមេសា ស្របពេលពន្ធគយពិសេសជាមួយអត្រាដ៏ខ្ពស់ សម្រាប់ដៃគូពាណិជ្ជកម្មធំៗ នឹងចាប់ផ្តើមនៅថ្ងៃទី៩ ខែមេសា៕
