ក្រុមហ៊ុន CART TIRE CO., LTD, ក្រុមហ៊ុន Daehan Auto (Cambodia) Co., Ltd និង៣. ក្រុមហ៊ុន Soyang Decorative Lighting (Cambodia) Co., Ltd. ដែលកំពុងវិនិយោគនៅកម្ពុជា គ្រោងនឹងពង្រីកចង្វាក់ផលិកម្មក្នុងវិស័យយានយន្ត និងអេឡិចត្រូនិកនៅកម្ពុជា។
ការលើកឡើងនេះ ត្រូវបានធ្វើឡើងនៅក្នុងដំណើរទស្សនកិច្ចសិក្សារបស់លេខាធិការដ្ឋានដឹកនាំ និងសម្របសម្រួលការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា នៃក្រុមប្រឹក្សាអភិវឌ្ឍន៍កម្ពុជា ទៅកាន់ក្រុមហ៊ុនក្នុងវិស័យយានយន្ត និងអេឡិចត្រូនិក កាលពីពេលថ្មីៗនេះ ។
ដំណើរទស្សនកិច្ចនេះ ត្រូវបានធ្វើឡើងក្នុងគោលបំណងបង្កើនការយល់ដឹងអំពីប្រតិបត្តិការ, ខ្សែច្រវ៉ាក់ផលិតកម្ម, បញ្ហាប្រឈម និងសំណូមពរនានា របស់ក្រុមហ៊ុនដើម្បីជាធាតុចូល សម្រាប់ការរៀបចំរបាយការណ៍វាយតម្លៃវឌ្ឍនភាព ២ឆ្នាំ (២០២៣-២០២៤) នៃការអនុវត្តផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា។ ជារួម ដំណើរទស្សនកិច្ច សិក្សានេះ ដ៏មានសារៈសំខាន់សម្រេចបានលទ្ធផលល្អតាមការរំពឹងទុក ។
តាមរយៈដំណើរទស្សនកិច្ចនេះ តំណាងក្រុមហ៊ុនទាំងបី ក៏បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា តាមរយៈក្រុមប្រឹក្សាអភិវឌ្ឍន៍កម្ពុជា ដែលមានចក្ខុវិស័យការដឹកនាំច្បាស់លាស់សម្រាប់ជំរុញនិងអភិវឌ្ឍវិស័យវិនិយោគ និងឧស្សាហកម្មកម្ពុជា ពិសេសការយកចិត្តទុកដាក់ថែទាំដល់ក្រុមហ៊ុនដែលបានមកវិនិយោគមានការលូតលាស់ និងពង្រីកចង្វាក់ផលិកម្មនៅកម្ពុជា។
សូមជម្រាបថា ក្រុមហ៊ុនទាំង ៣ ខាងលើនេះ រួមមាន៖ ១. ក្រុមហ៊ុន CART TIRE CO., LTD. ដែលជាក្រុមហ៊ុនផលិតសំបកកង់យានយន្ត, ២. ក្រុមហ៊ុន Daehan Auto (Cambodia) Co., Ltd. ដែលជាក្រុមហ៊ុនផ្គុំ និងដំឡើង រថយន្ត, និង៣. ក្រុមហ៊ុន Soyang Decorative Lighting (Cambodia) Co., Ltd. ដែលជាក្រុមហ៊ុន ផលិតគ្រឿងបរិក្ខារអំពូលអគ្គិសនី៕អត្ថបទ៖ហ្សាលីន
