ជំងឺរាតត្បាតសកលកូវីដ-១៩ បានវ៉ៃលុកពាសពេញពិភពលោក ដែលជាហេតុបណ្តាលឲ្យរងនៅផលប៉ះពាល់យ៉ាងខ្លាំងដល់ដំណើរការអភិវឌ្ឍន៍សេដ្ឋកិច្ច មិនតែប៉ុណ្ណោះ ក្រុមហ៊ុន សហគ្រាស ស្ទើរទាំងអស់ជួបវិបត្តិហិរញ្ញវត្ថុ ដូច្នេះចង់ឬមិនចង់ ម្ចាស់ក្រុមហ៊ុនអាចនឹងមានការកាត់បន្ថយបុគ្គលិក ខណៈក្រុមហ៊ុនមួយចំនួនទៀតក៏បានបញ្ឈប់បុគ្គលិកតែម្តង។
សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ
លោកឧកញ៉ា វេជ្ជបណ្ឌិត គួច ម៉េងលី ប្រធានអគ្គនាយកនៃក្រុមហ៊ុន ម៉េងលី ជេ. គួច អេឌ្យូខេសិន ថ្លែងនៅក្នុងវេទិកាចែករំលែកចំណេះដឹងដែលរៀបចំឡើងដោយក្រុមហ៊ុនអន្តរជាតិក្នុងស្រុកមួយ បានបង្ហាញការយល់ឃើញថា ចំពោះអ្នកដែលមានទ្រព្យសម្បត្តិស្តុកស្តម្ភរួចទៅហើយ ជំងឺរាតត្បាតមិនសូវជាបង្កផលប៉ះពាល់ខ្លាំងនោះទេ ក៏ប៉ុន្តែសម្រាប់អ្នកធ្វើការធម្មតា ដែលរំពឹងប្រាក់ខែមួយខែៗ គឺត្រូវប្រឈមជាខ្លាំងជាមួយនឹងបញ្ហាជំងឺផ្លូវចិត្តនេះ ។
លោកបន្តថា នៅពេលមានជំងឺរាតត្បាត បិទខ្ទប់ទីក្រុង ត្រូវឱ្យបុគ្គលិកបង្ខំចិត្តធ្វើការនៅផ្ទះ ហើយការធ្វើការនៅផ្ទះនេះ មិនមែនជារឿងងាយស្រួល។ណាមួយរឿងអ៊ីនធើណែតដើរយឺត ណាត្រូវមើលកូន ដោយសារតែសាលារៀនត្រូវបានបិទ ដែលបង្កើតឱ្យមានជាការធុញថប់។ ម្យ៉ាង សម្ពាធហិរញ្ញវត្ថុដែលបណ្តាលមកពីវិបត្តិសេដ្ឋកិច្ចបង្កដោយជំងឺកូវីដ-១៩ ក៏ជាកត្តាយាយីដល់ផ្លូវចិត្តរបស់បុគ្គលិកផងដែរ ។
បើតាមលោកឧកញ៉ា ដោយសារជំងឺរាតត្បាត មនុស្សជាច្រើនមានចំណូលធ្លាក់ចុះ ហើយណាមួយត្រូវបង់ធនាគារ ។ ដូច្នេះបញ្ហាទាំងអស់នេះហើយដែលរួមគ្នាបង្កឱ្យពួកគាត់មានបញ្ហាផ្លូវអារម្មណ៍ អាចក្លាយជាស្ត្រេស ឬបាក់ទឹកចិត្ត។
ជាមួយនឹងបញ្ហាទាំងនេះ សម្រាប់លោកឧកញ៉ាបានឲ្យយោបល់ថា និយោជកគួរតែខិតខំប្រឹងប្រែងគាំទ្របុគ្គលិកឱ្យបានយូរតាមតែអាចធ្វើទៅបាន យ៉ាងហោចណាស់រហូតដល់ពេលមួយដែលពួកគាត់ធ្វើទៅលែងរួច ។
លោកបន្ថែមថា ក្នុងនាមជានិយោជក យើងត្រូវតែមានការអត់ធ្មត់ ការយោគយល់ ហើយត្រូវដោះស្រាយបញ្ហាតាមការប្រឹក្សា និងពិភាក្សាគ្នា ហើយត្រូវតែមានគណៈកម្មាធិការសម្រាប់ធ្វើការសម្រេចចិត្ត ។ ព័ត៌មានត្រូវតែបានចែកចាយទៅដល់មនុស្សដែលពាក់ព័ន្ធ ហើយយើងត្រូវតែចាំជួយបុគ្គលិករបស់យើងនៅពេលដែលពួកគាត់មានបញ្ហាតាមរយៈមូលនិធិរបស់យើង៕
