ការសន្សំប្រាក់គឺជាបញ្ហាដ៏ធំមួយនាពេលបច្ចុប្បន្ន ដ្បិតពេលនេះការទិញឥវ៉ាន់អនឡាញ គឺមានភាពងាយស្រួលពេក ហើយពេលខ្លះយើងអាចនឹងចាយវាយខ្ជះខ្ជាយដោយមិនដឹងខ្លួនក៏ថាបាន ហើយបញ្ហានេះក៏ជាចំណោទធំសម្រាប់អ្នកធ្វើការដែលមានប្រាក់ខែនៅកម្រិតមធ្យមផងដែរ។
សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ
យ៉ាងណាមិញ សម្រាប់អត្ថបទមួយនេះ អ្នកជំនាញនឹងចែករំលែកនូវគន្លឹះសន្សំប្រាក់មួយ ដែលត្រូវបានគេហៅថា ច្បាប់នៃការចាយវាយ ១%។ និយាយឲ្យខ្លី ប្រសិនបើអ្នកចង់ទិញផលិតផលមួយដែលមានតម្លៃស្មើ ឬលើស ១% នៃចំណូលប្រចាំឆ្នាំរបស់អ្នក នោះគួរពិចារណាមួយថ្ងៃ មុននឹងសម្រេចចិត្តទិញរបស់នោះ។
ឧបមាថា ចំណូលសរុបប្រចាំឆ្នាំរបស់អ្នកគឺ ៦០ ០០០ ដុល្លារ ហើយអ្នកចង់ទិញទូសម្លៀកបំពាក់មួយមានតម្លៃ ៦០០ ដុល្លារ ដែលស្មើនឹង ១% នៃចំណូលប្រចាំឆ្នាំ។ ស្ថិតក្នុងស្ថានការណ៍បែបនេះ អ្នកគួរពិចារណាមួយថ្ងៃមុនធ្វើការសម្រេចចិត្ត ព្រោះអ្នកអាចយក ៦០០ ដុល្លារទៅជួសជុលទូចាស់ ឬអាចស្វែងរកទូផ្សេងដែលមានតម្លៃធូរថ្លៃជាងនេះក៏ថាបាន។
គន្លឹះខាងលើគឺត្រូវបង្ហើបប្រាប់ដោយ Glen James ដែលជាអតីតទីប្រឹក្សាហិរញ្ញវត្ថុ នៅពេលលោកបានទិញនាឡិកាឆ្លាតវៃ Apple Watch តម្លៃ ១ ៣០០ ដុល្លារ ទាំងដែលលោកគ្មានគម្រោងទិញវាឡើយ ពោលគឺនៅពេលដើរផ្សារជាមួយមិត្តភក្ដិ ស្រាប់តែទិញនាឡិកាភ្លាមៗ។ ក្រោយមកទើបលោកបង្កើតវិធី ១% នៃការចំណាយនេះ ដើម្បីជៀសវាងការចាយវាយឥតព្រៀងទុកដូចកន្លងមក។
ចុងក្រោយ ច្បាប់នៃការចាយវាយ ១% នេះមិនមែនសុទ្ធតែអាចប្រើគ្រប់កាលៈទេសៈបានទេ គ្រាន់តែថាវាជាគន្លឹះមួយក្នុងចំណោមវិធីច្រើនទៀត សម្រាប់ការសន្សំថវិកា ហើយវិធីសាស្ត្រល្អបំផុតនោះ គឺអ្នកអាចសន្សំបែបណាក៏បាន ឲ្យតែវាអាចមានប្រសិទ្ធភាពយូរអង្វែង និងផ្ដល់ភាពងាយស្រួលដល់ខ្លួនអ្នក៕
ប្រភព: cnbc
