កាលពីថ្ងៃទី ៣០ សីហាម្សិលមិញនេះ ហាងលក់ទំនិញរាយដ៏ល្បីល្បាញ 7-Eleven បានប្រកាសបើកសាខាដំបូងបង្អស់នៅកម្ពុជា ដែលមានទីតាំងនៅតំបន់ជ្រោយចង្វា ហើយត្រូវបានក្រុមហ៊ុន CP All (Cambodia) Plc ជាអ្នកទិញសិទ្ធិផ្ដាច់មុខ ខណៈក្រុមហ៊ុននេះក៏បានអះអាងថា សាខាបន្តបន្ទាប់នឹងលេចវត្តមាននាពេលឆាប់ៗខាងមុខ។
យ៉ាងណា ដ្បិតនេះជាសាខាដំបូងនៅកម្ពុជាមែន តែ 7-Eleven មានសាខាជាច្រើនទូទាំងពិភពលោកឯណោះ ដែលរាប់ទៅច្រើនជាង ៦ ម៉ឺនកន្លែង ហើយភាគច្រើនមាននៅប៉ែកអាមេរិកខាងជើង និងនៅតំបន់អាស៊ី។
7-Eleven គឺជាក្រុមហ៊ុនមានទីតាំងស្ថិតនៅសហរដ្ឋអាមេរិក ដែលមានទីស្នាក់ការកណ្ដាលនៅទីក្រុង Dallas រដ្ឋ Texas។ បើមើលពីប្រវត្តិក្រុមហ៊ុនមួយនេះ គឺហាក់មានការតស៊ូខ្លាំងមែនទែន ព្រោះពីដើមឡើយ មុនមានសាខារាប់ម៉ឺនកន្លែង ពួកគេធ្លាប់ប្រកាសក្ស័យធនដល់ទៅ ២ លើកឯណោះ។
ត្រឡប់ទៅកាលពីឆ្នាំ ១៩២៧ ដែលជាការចាប់ផ្ដើមដំបូងរបស់ 7-Eleven ដែលកាលនោះ ប្រជាជននៅតំបន់ Texas មិនទាន់មានអគ្គិសនីប្រើប្រាស់គ្រប់គ្រាន់ ដូច្នេះ Uncle Johnny ក៏បាននឹកឃើញយកដុំទឹកកកមកលក់ ដើម្បីបំពេញតម្រូវការអតិថិជន ដោយលោកបើកហាងរហូតដល់ ១៦ ម៉ោង/ថ្ងៃ និង ៧ ថ្ងៃ/សប្ដាហ៍។
លុះក្រោយមកទើបលោកចាប់ផ្ដើមដាក់លក់គ្រឿងទេស និងចំណីអាហារផ្សេងៗ ដោយមានការឲ្យយោបល់ពីអតិថិជនមកទិញទឹកកក និងបានដាក់ឈ្មោះហាង Tote’m Store។ តែនៅអំឡុងវិបត្តិសេដ្ឋកិច្ចពិភពលោកចន្លោះឆ្នាំ ១៩២៩-១៩៣៩ Tote’m Store ក៏ដូចជាហាងដ៏ទៃបានប្រកាសក្ស័យធនមួយសារ។
លុះដល់ឆ្នាំ ១៩៤៦ ហាងមួយនេះបានងើបឡើងសារថ្មី តែប្ដូរឈ្មោះទៅជា 7-Eleven និងបានរក្សាម៉ោងធ្វើការដដែលពីម៉ោង ៧ ព្រឹកដល់ម៉ោង ១១ យប់ ៧ថ្ងៃ/សប្ដាហ៍ដដែល។ ក្រោយមក នៅចុងទសវត្ស ១៩៥០ ពួកគេបានពង្រីកសាខាពីទឹកដីខាងត្បូង រហូតដល់ភាគខាងកើតនៃសហរដ្ឋអាមេរិក ហើយនៅឆ្នាំ ១៩៦៣ 7-Eleven ចាប់ផ្ដើមបើកលក់ ២៤ ម៉ោង និងប្រកាសលក់សិទ្ធិផ្តាច់មុខនៅឆ្នាំបន្ទាប់។
ឆ្នាំ ១៩៧៣ 7-Eleven មានសាខាដំបូងនៅប្រទេសជប៉ុន និងមានសាខារហូតដល់ជាង ៥ ០០០ កន្លែងទូទាំងពិភពលោកគិតត្រឹមឆ្នាំ ១៩៧៤។ ប៉ុន្តែនៅទសវត្ស ១៩៨០ ក្រុមហ៊ុនមួយនេះទទួលបានការគំរាមកំហែង ដោយជាប់បំណុលជាច្រើន រហូតដល់លក់ក្រុមហ៊ុនបុត្រសម្ព័ន្ធស្ទើរទាំងអស់ដើម្បីលោះបំណុល ហើយនៅឆ្នាំ ១៩៩០ ក៏ប្រកាសក្ស័យធនជាលើកទី ២។
ដោយសារ ការព្យាយាមតស៊ូ Southland Corp. ក៏បានងើបមកវិញម្ដងទៀត ដោយលើកនេះប្ដូរទាំងឈ្មោះស្ថាប័នតែម្ដង ដោយដាក់ 7-Eleven, Inc វិញ នៅឆ្នាំ ១៩៩៩ និងបន្តពង្រីកវិសាលភាពដល់ទៅជាង ២៥ ០០០ កន្លែងត្រឹមឆ្នាំ ២០០៣។
ទីបំផុត 7-Eleven បានក្លាយជាហាងលក់ទំនិញរាយពេញនិយមបំផុតមួយនៅលើពិភពលោក ដែលមានសាខាច្រើនជាង ៦ ម៉ឺនកន្លែង នៅ ២៤ ប្រទេស ដែលក្នុងនោះមាន ១៥ ប្រទេសនៅទ្វីបអាស៊ី ខណៈមូលធនទីផ្សាររបស់ 7-Eleven គិតត្រឹមខែសីហា ២០២១ គឺប្រមាណ ៣៨,៤៤ ពាន់លានដុល្លារ៕
ប្រភព: britannica
