នៅរសៀលថ្ងៃទី ២០ វិច្ឆិកា នេះ មានការភ្ញាក់ផ្អើលកើតឡើងជាថ្មីម្តងទៀត ក្រោយករណីធ្លាក់ដែកដ៏ធំមួយពីលើការដ្ឋានសំណង់អគារ៤២ជាន់ ដែលមាន ទីតាំងស្ថិតតាមបណ្តោយផ្លូវព្រះមុនីវង្ស កែងផ្លូវព្រះសីហនុ ក្នុងសង្កាត់បឹងកេងកងទី១ ខណ្ឌបឹងកេងកង ។
ព័ត៌មានបឋម បានឲ្យដឹងថា ហេតុការណ៍ដ៏រន្ធត់នេះ ដែកបានធ្លាក់ទៅចំរថយន្តស៊េរីទំនើបម៉ាកមែរហ្ស៊ីដែសមួយគ្រឿង ពណ៌ខ្មៅ ពាក់ស្លាកលេខភ្នំពេញ២BC-៧៧៨៨ ខណៈដែលកំពុងតែធ្វើដំណើរតាមផ្លូវនោះបណ្តាលឱ្យបែកកញ្ចក់ផ្នែកខាងក្រោយយ៉ាងធ្ងន់ធ្ងរ ។ ប៉ុន្តែសំណាងល្អបំផុត ដែលមិនមានមនុស្សណាម្នាក់ត្រូវរងគ្រោះថ្នាក់ ។
នេះជាលើកទី២ហើយ កាលពីកន្លងមកថ្មីនេះ ក៏ធ្លាប់មានករណីធ្លាក់ដែកសរសៃចាក់ទម្លុះក្បាលរថយន្តម៉ាកLEXUS មួយគ្រឿងម្តងរួចមកហើយដែរ ។ សូមអាជ្ញាធរមានសមត្ថកិច្ចចុះអន្តរាគមន៍ផង កុំបណ្តោយឱ្យកើតឡើងដដែលជាដដែល៕
