ក្រុមហ៊ុន Tesla Inc បានប្រកាសពីគម្រោងការយក្សមួយ ដែលនឹងអាចវិនិយោគទឹកប្រាក់ដល់ទៅ ១,២ ពាន់លានយ័ន ឬ ១៨៨ លានដុល្លារអាមេរិក ដើម្បីពង្រីកសកម្មភាពផលិតនៅឯសាខាទីក្រុងសៀងហៃ ដែលនឹងអាចអនុញ្ញាតបន្ថែមបុគ្គលិក ៤ ០០០ នាក់ថែមទៀត។ នេះបើតាមការចុះផ្សាយពី Beijing Daily។
រោងចក្រផលិតយានយន្ត Tesla នៅទីក្រុងសៀងហៃគឺអាចមានសមត្ថភាពផលិតឡានបានរហូតដល់កន្លះលានគ្រឿងក្នុងមួយឆ្នាំ ខណៈបច្ចុប្បន្នគឺអាចផលិតបានត្រឹម ២ ម៉ូដែលប៉ុណ្ណោះគឺ រថយន្តប្រភេទ Model 3 និង Model Y ក្នុងតួលេខប្រមាណ ៤៥០ ០០០ គ្រឿង/ឆ្នាំ។
យ៉ាងណា ស្ថិតិនៃការលក់របស់ Tesla នៅតែបន្តកើនឡើង បើទោះជាកន្លងមកពួកគេធ្លាប់ទទួលការចោទប្រកាន់អំពីសុវត្ថិភាពផលិតផល និងការត្រួតពិនិត្យពីរបៀបដែលក្រុមហ៊ុនគ្រប់គ្រងទិន្នន័យអតិថិជនក្ដី ហើយកាលពីខែមុន Tesla បានអះអាងថា ពួកគេនឹងសាងសង់កន្លែងស្រាវជ្រាវបន្ថែមនៅទីក្រុងសៀងហៃបន្ថែមទៀត។
បច្ចុប្បន្នគ្រប់រថយន្តប្រភេទ Model 3 ដែលផលិតនៅប្រទេសចិនទាំងអស់កំពុងវៃចេញនៅលើទីផ្សារតំបន់អឺរ៉ុប ខណៈកាលពីខែតុលាកន្លងទៅ រថយន្តផលិតនៅប្រទេសចិនប្រមាណ ៥៤ ៣៩១ គ្រឿងបានលក់អស់នៅលើទីផ្សារតំបន់អឺរ៉ុប រាប់បញ្ចូលទាំងការនាំចេញ ៤០ ៦៦៦ គ្រឿងផងដែរ នេះបើតាមការអះអាងពីសមាគមរថយន្តដឹកអ្នកដំណើរចិន China Passenger Car Association៕
ប្រភព: Investing
